North Korea Spy Satellite Launch Fail : మరోసారి విఫలమైన ఉత్తర కొరియా 'స్పై' రాకెట్.. అయినా తగ్గేదేలే!

North Korea Spy Satellite Launch Fail : అమెరికా, దక్షిణ కొరియాలపై నిఘా లక్ష్యంగా ఉత్తర కొరియా రెండోసారి ప్రయోగించిన గూఢచార ఉపగ్రహ ప్రయోగం విఫలమైంది. ఈ ఏడాది చివరలో మరోసారి ప్రయత్నిస్తామని ఉత్తర కొరియా తెలిపింది.

North Korea Spy Satellite Launch Fail : గురువారం తాము ప్రయోగించిన రెండో స్పై శాటిలైట్​ (గూఢచార ఉపగ్రహం) విఫలమైందని ఉత్తర కొరియా తెలిపింది. మూడు దశల రాకెట్​లో తలెత్తిన లోపం కారణంగా ఈ ప్రయోగం ఫెయిల్ అయినట్లు వెల్లడించింది. ఈ ప్రయోగంలో జరిగిన వైఫల్యాలను అధ్యయనం చేసిన తర్వాత.. అక్టోబర్‌లో మూడోసారి ప్రయత్నించనున్నట్లు ఉత్తర కొరియా నేషనల్ ఏరోస్పేస్ డెవలప్‌మెంట్ అడ్మినిస్ట్రేషన్ తెలిపింది.

North Korea Spy Satellite Name : గూఢచార ఉపగ్రహం 'మల్లిగ్యోంగ్-1'ను కక్ష్యలోకి ప్రవేశపెట్టేందుకు కొత్త తరహా రాకెట్ 'చోల్లిమా-1'ను ఉపయోగించినట్లు ఉత్తర కొరియా అంతరిక్ష సంస్థ తెలిపింది. రాకెట్.. మొదటి రెండు దశలు సాధారణంగానే సాగినా.. మూడో దశ ఎమర్జెన్సీ బ్లాస్టింగ్ సిస్టమ్‌లో లోపం కారణంగా ప్రయోగం చివరికి విఫలమైందని ఉత్తర కొరియా తెలిపింది.

ఉత్తర కొరియా ప్రయోగం కారణంగా జపాన్​ 'జే-అలర్ట్​' జారీ చేసింది. ఆ స్పై రాకెట్​.. జపాన్​ దక్షిణ ప్రాంతంలోని ఒకినావా దీవుల మీదుగా వెళ్లడం వల్ల.. అక్కడి స్థానికులను సురక్షిత ప్రాంతాలకు తరలించాలని ఆదేశించింది. శాంతి, స్థిరత్వానికి ఉత్తర కొరియా చేపట్టిన ఈ ప్రయోగం ముప్పు అని జపాన్ చీఫ్​ కేబినెట్ సెక్రటరీ హిరోకాజు ముట్సునో అభివర్ణించారు. ఈ ప్రయోగం ద్వారా జరిగిన నష్టాన్ని పరిశీలించాలని, మిత్ర దేశాలతో సమన్వయం చేసుకోవాలని ప్రధాని ఫుమియో కిషిద ఆదేశించారని చెప్పారు. అయితే ఈ ప్రయోగం వల్ల జరిగిన నష్టంపై వివరాలు ఇంకా తెలియలేదని ఆయన అన్నారు.

అంతకుముందు ఉత్తర కొరియా వాయువ్య టోంగ్​చాంగ్​-రి ప్రాంతంలో ఉన్న ప్రధాన అంతరిక్ష కేంద్ర నుంచి ప్రయోగించిన రాకెట్​.. కొరియన్ ద్వీపకల్పం పశ్చిమ తీరంలో అంతర్జాతీయ జలాల మీదుగా వెళ్లిందని దక్షిణ కొరియా జాయింట్​ చీఫ్స్​ ఆఫ్​ స్టాఫ్​ ఒక ప్రకటనలో వెల్లడించింది. ఉత్తర కొరియా స్పై శాటిలైట్​ విఫలమైందని నిర్ధరించింది. బాలిస్టిక్ టెక్నాలజీని ఉపయోగించి ఎలాంటి ప్రయోగాలు చేయొద్దన్న ఐక్యరాజ్య సమితి తీర్మానాలను ఈ ప్రయోగం ఉల్లంఘించిందని దక్షిణ కొరియా పేర్కొంది.

North Korea Spy Satellite Crashes Into Sea : అమెరికా, దక్షిణ కొరియాలపై నిఘా ఉంచడానికి మే చివరలో మొదటి గూఢచార ఉపగ్రాహాన్ని ప్రయోగించింది ఉత్తర కొరియా. అయితే, దాన్ని మోసుకెళ్లిన రాకెట్ నింగిలోకి దూసుకెళ్లిన కొద్దిసేపటికే సముద్రంలో కుప్పకూలింది. దీంతో మరోసారి ప్రయోగం చేస్తామని అప్పుడు కిమ్​ సర్కార్​ ప్రతిజ్ఞ చేసింది.