దీపావళి పర్వదినాన్ని పురస్కరించుకుని భారత జాతిపిత మహాత్మాగాంధీని ప్రత్యేకంగా స్మరించుకుంది బ్రిటీష్ ప్రభుత్వం. ఆయన జీవితసారాన్ని తెలిపేలా.. తొలిసారి బ్రిటిష్ స్పెషల్ కలెక్టర్ల నాణెం(gandhi coin uk) ముద్రించినట్లు యూకే ట్రెజరీ చీఫ్ రిషి సునక్ గురువారం ప్రకటించారు.
గుండ్రంగా ఉండే రాయల్ నాణెంపై(mahatma gandhi british coin) గాంధీజీ ప్రముఖ మాట ' నా జీవితమే నా సందేశం 'తో పాటు భారత జాతీయ పుష్పం పద్మం ఉంటుందని తెలిపారు రిషి సునక్. భారత స్వాతంత్య్రం కోసం అహింస మార్గాన్ని ఎంచుకున్న గాంధీజీని(Mahatma Gandhi ) అధికారిక యూకే నాణెంపై ముద్రించడం ఇదే తొలిసారని చెప్పారు.
" ఒక హిందువుగా.. దీపావళి సందర్భంగా ఈ నాణాన్ని ఆవిష్కరించటం చాలా సంతోషంగా ఉంది. భారత స్వాతంత్య్ర ఉద్యమంలో గాంధీ కీలక పాత్ర పోషించారు. తొలిసారి ఆయన విశేషమైన జీవితాన్ని గుర్తుచేసే యూకే నాణెం కలిగి ఉండటం చాలా అద్భుతంగా ఉంది. "
- రిషి సునక్, ట్రెజరీ చీఫ్.
5 పౌండ్లు విలువ గల ఈ నాణాన్ని బంగారం, వెండితో కలిపి తయారు చేశారు. అయితే.. దీనిని సాధారణ చలామణి కోసం ముద్రించలేదు. దీపావళి నుంచి దీనిని విక్రయించనున్నారు. ఈ నాణెంతో పాటు 1 గ్రాము, 5 గ్రాముల పసిడి కడ్డీలు ఇస్తారు. తొలిసారి ఈ కడ్డీలపై హిందూ దేవత మహాలక్ష్మీని ముద్రించి ఇస్తుండటం గమనార్హం. వైవిధ్యమైన బ్రిటన్ నిర్మాణం పేరుతో సరికొత్త 50పీ నాణేన్ని గత ఏడాది తీసుకొచ్చారు రిషి. 2020, అక్టోబర్ నుంచి ఇప్పటి వరకు 10 మిలియన్ నాణెలు చలామణిలోకి వచ్చాయి.
ఇదీ చూడండి: Azadi Ka Amrit Mahotsav: గాంధీ కోరిన దీపావళి వెలుగులివీ..
