ప్రపంచ ఆరోగ్య సంస్థ (డబ్ల్యూహెచ్ఓ)పై అమెరికా అధ్యక్షుడు డొనాల్డ్ ట్రంప్ మరోమారు విరుచుకుపడ్డారు. చైనా చేతిలో డబ్ల్యూహెచ్ఓ కీలుబొమ్మ అని విమర్శించారు.
చైనా నుంచి వచ్చే వారిని నిషేధించడం వల్ల అగ్రరాజ్యంలో అనేకమంది ప్రాణాలు కాపాడినట్టు ట్రంప్ తెలపారు. తన నిర్ణయాన్ని డబ్ల్యూహెచ్ఓ వ్యతిరేకించిందని మండిపడ్డారు.
"చైనా చేతిలో డబ్ల్యూహెచ్ఓ కీలుబొమ్మ. చైనాకు అనుకూలంగా డబ్ల్యూహెచ్ఓ వ్యవహరిస్తోంది. సంస్థ తన బాధ్యతను సరిగ్గా నిర్వర్తించలేదు. చైనా పర్యటకులను నేను నిషేధించినప్పుడు.. డబ్ల్యూహెచ్ఓ వ్యతిరేకించింది. ఇది చాలా కఠిన చర్యగా పేర్కొంది. కానీ ఇప్పుడు డబ్ల్యూహెచ్ఓ మాటలు తప్పని రుజువయ్యాయి."
--డొనాల్డ్ ట్రంప్, అమెరికా అధ్యక్షుడు.
మాజీ ఉపాధ్యక్షుడు, డెమొక్రాట్ పార్టీ నుంచి అధ్యక్ష బరిలో ఉన్న జో బిడెన్ కూడా తన నిర్ణయాన్ని వ్యతిరేకించినట్టు గుర్తు చేశారు ట్రంప్. చైనా నుంచి వచ్చే వారిపై నిషేధం విధించడం ఎంతో ముఖ్యమని పేర్కొన్న ట్రంప్.. ఈ నిర్ణయంతో కొన్ని వేల ప్రాణాలు కాపాడినట్టు స్పష్టం చేశారు.
