ఆఫ్రికా దేశం సియెర్రా లియోన్లో ఘోర ప్రమాదం జరిగింది. రాజధాని ఫ్రీటౌన్లో ఆయిల్ ట్యాంకర్ పేలడం వల్ల 100 మంది మరణించారు. అనేక మంది గాయపడ్డారు. క్షతగాత్రుల్లో చాలా మంది పరిస్థితి విషమంగా ఉందని ఆ దేశ విపత్తు నిర్వహణ ఏజెన్సీ డైరెక్టర్ మొహమద్ లమ్రేన్ బా వెల్లడించారు. బాధితులకు చికిత్స కొనసాగుతోందని చెప్పారు.
ఓ ఆయిల్ ట్యాంకర్.. గ్యాస్ స్టేషన్ వద్ద ఉండగా ఈ ప్రమాదం జరిగింది. ప్రయాణికులతో కూడిన ఓ బస్సు వచ్చి ఆయిల్ ట్యాంకర్ను ఢీ కొట్టింది. దీంతో ట్యాంకర్ నుంచి ఇంధనం లీక్ అయింది. దాన్ని సేకరించేందుకు చాలా మంది స్థానికులు గ్యాస్ స్టేషన్ వద్దకు చేరుకున్నారు. ఈ సమయంలోనే భారీ శబ్దంతో పేలుడు సంభవించింది. ఫలితంగా అనేక మంది మరణించారు.
ఫ్రీటౌన్ మేయర్ వోనే అకి సాయర్.. ఈ ఘటన పట్ల విచారం వ్యక్తం చేశారు. వెల్లింగ్టన్ ప్రాంతంలోని బాయ్ బురెహ్ రోడ్లో ఈ ప్రమాదం జరిగిందని ఫేస్బుక్ పోస్ట్లో పేర్కొన్నారు. మృతుల కుటుంబాలకు సంతాపం ప్రకటించారు.
ఈ ఘటన పట్ల సియోర్రా లియోన్ అధ్యక్షుడు జులియస్ మాడ బయో.. విచారం వ్యక్తం చేశారు. ప్రస్తుతం ఆయన.. కాప్26 వాతావరణ సదస్సు కోసం స్కాట్లాండ్లో ఉన్నారు.
