తెలుగులో రీరిలీజ్ ట్రెండ్ కొనసాగుతోంది. ఇది వరకే మహేశ్ బాబు 'పోకిరి', పవన్ కల్యాణ్ 'జల్సా', బాలకృష్ణ 'చెన్నకేశవ రెడ్డి' సినిమాల రీరిలీజ్కు సైతం భారీగా అభిమానులు వచ్చారు. తాజాగా ఈ ఖాతాలోకి ప్రభాస్ చేరారు. ప్రభాస్ నటించిన 'రెబెల్' ప‌దేళ్ల త‌ర్వాత మ‌ళ్లీ థియేట‌ర్ల‌లో రీ రిలీజ్ కాబోతుంది.
లారెన్స్ దర్శకత్వంలో 2012లో 'రెబెల్' సినిమా వచ్చింది. మంచి యాక్ష‌న్ ఎంట‌ర్‌టైన‌ర్‌గా తెర‌కెక్కిన ఈ సినిమాలో ప్రభాస్ సరసన తమన్నా నటించారు. ఈ మూవీలో ఇటీవలే మరణించిన రెబల్ స్టార్ కృష్ణంరాజు కూడా ఓ కీలక పాత్ర చేశారు. అయితే ఈ సినిమా బాక్సాఫీస్ వద్ద బోల్తా కొట్టింది. నిర్మాత‌ల‌కు న‌ష్టాల‌ను మిగిల్చింది. 'రెబెల్' సినిమాకు ద‌ర్శ‌క‌త్వం వ‌హించ‌డంతో పాటు సంగీతాన్ని లారెన్స్ అందించారు. ఈ సినిమా విష‌యంలో నిర్మాత‌ల‌కు లారెన్స్‌తో విభేదాలు వ‌చ్చాయని అప్పట్లో వార్తలు వచ్చాయి. అయితే అక్టోబరు 15న ప్రభాస్ పుట్టిన‌రోజు సందర్భంగా ఈ సినిమా రీ రిలీజ్ కానుంది.
ప్రభాస్ ప్రస్తుతం వరుస సినిమాలతో బిజీగా ఉన్నారు. ప్రముఖ బాలీవుడ్ దర్శకుడు ఓం రౌత్ తెరకెక్కించిన 'ఆదిపురుష్' టీజర్ ఇటీవలే రిలీజ్ అయింది. అలాగే ప్రశాంత్ దర్శకత్వంలో సలార్, నాగ్అశ్విన్తో మరో ప్రాజెక్టులో బిజీగా ఉన్నారు ప్రభాస్.
ఇవీ చదవండి: మాల్దీవుల్లో చేత్నా ఫుల్ ఎంజాయ్.. రాధికా ఆప్టే గ్లామర్ ట్రీట్
కొత్త వెబ్సిరీస్ కోసం సామ్ 'స్పెషల్' ట్రైనింగ్.. షూటింగ్ అప్పుడే!
