Haesoo Kpop Singer Died : తన పాటలతో శ్రోతలను అలరించిన ప్రముఖ కొరియన్ పాప్ (కే-పాప్) సింగర్ హేసూ (29) మృతిచెందింది. దక్షిణ కొరియా జియోల్లబుక్-డో ప్రావిన్స్లోని వాంజుగన్ కౌంటీలోని తన హోటల్ గదిలో విగతజీవిగా పడి ఉంది. ఈ మేరకు సమాచారం అందుకున్న పోలీసులు.. ఆమె మృతదేహం వద్ద ఓ సూసైడ్ నోట్ను స్వాధీనం చేసుకున్నారు. మే 20న జరగబోయే ఓ ఈవెంట్ కోసం వాంజుగన్ చేరుకున్న హేసూ.. ఆ తర్వాత చనిపోయింది. హేసూ మృతదేహాన్ని సాధ్యమైనంత త్వరలో ఆమె కుటుంబ సభ్యులకు అప్పగిస్తామని పోలీసులు తెలియజేశారు.
హేసూ మరణ వార్త తెలియడం వల్ల ఆమె సహచరులు, తోటి గాయకులు, అభిమానులు షాక్కు గురయ్యారు. సోషల్ మీడియా వేదికగా పాప్ సింగర్ మృత పట్ల సంతాపం తెలుపుతున్నారు. ఆమె సంగీత నైపుణ్యాలను, అద్భుతమైన గాత్రాన్ని, కొరియన్ సంగీతానికి ఆమె చేసిన సేవలను కొనియాడుతున్నారు. మరి కొందరు.. కొరియన్ సెలబ్రెటీలు ఎదుర్కొంటున్న ఒత్తిడి గురించి చర్చిస్తున్నారు.
1993లో జన్మించిన హేసూ అసలు పేరు కిమ్ సూ యున్ (Kim Soo-hyun). తన గాత్రం, నైపుణ్యాలతో మంచి గుర్తింపు పొందింది. కొరియన్ సంప్రదాయ సంగీతం 'పన్సోరి'లో.. కొరియా నేషనల్ యూనివర్సిటీ ఆఫ్ ఆర్ట్స్ నుంచి డిగ్రీ పట్టా అందుకుంది. 'మై లైఫ్, మీ' అనే ఆల్బమ్తో 2019లో కే పాప్లోకి అరంగేట్రం చేసింది హేసూ. తన రెండో ఆల్బమ్ 2021లో రిలీజ్ చేసింది. ఆ తర్వాత గాయో స్టేజ్, మార్నింగ్ యార్డ్, హౌ డు యూ ప్లే, హ్యంగౌట్ విత్ యూ, ది ట్రోట్ షో, 2023 లూనార్ న్యూ ఈయర్ సందర్భంగా కేబీఎస్ టీవీలో ప్రసారమైన పోగ్రాంలో మెరిసింది.
అయితే, ఈ మధ్య కాలంలో కే పాప్ సింగర్ల ఆత్మహత్యలు ఎక్కువైపోతున్నాయి. ఒత్తిడిని తట్టుకోలేక చిన్న వయసులోనే బలవన్మరణానికి పాల్పడుతున్నారు. గత నెల 19న ఆస్ట్రో బ్యాండ్కు చెందిన ప్రముఖ కే-పాప్ స్టార్ మూన్బిన్ (25) చనిపోవడం ప్రపంచవ్యాప్తంగా దిగ్భ్రాంతికి గురి చేసింది. అయితే, కే-పాప్ స్టార్ కావడానికి చాలా తీవ్రమైన శిక్షణ ఉంటుంది. కొన్నేళ్ల పాటు కుటుంబాలకు దూరం కావాల్సి ఉంటుంది. ఇలా చిన్న వయసులోనే స్టార్లుగా ఎదిగుతారు యువతీ యువకులు. దక్షిణ కొరియాలో పోటీ ఎక్కువగా ఉంటుంది కనుక ఒకటి రెండు ఆల్బమ్స్ హిట్ కాకపోతే.. పాప్ సింగర్గా రాణించడం కష్టమవుతుంది. దీంతో ఆ ఒత్తిడిని తట్టుకోలేక ఆత్మహత్యలకు పాల్పడుతున్నారనే వాదనలు వినిపిస్తున్నాయి.
