కామెడీ టైమింగ్, వైవిధ్యమైన హావాభావాలతో ప్రేక్షకులను కడుపుబ్బా నవ్విస్తాడు రాకింగ్ రాకేశ్. అందుకే చాలా తక్కువ కాలంలోనే ఎక్స్ట్రా జబర్దస్త్లో టీమ్లీడర్ స్థాయికి చేరుకున్నాడు. మరోవైపు జోర్దార్ సుజాతగా బుల్లితెర ప్రేక్షకులకు పరిచయమైన సుజాత.. రాకేశ్ టీమ్ ద్వారా జబర్దస్త్లోకి ఎంట్రీ ఇచ్చి తనదైన స్టైల్లో నవ్విస్తూ ప్రేక్షకులను ఆకట్టుకుంటోంది. వీరిద్దరూ తమ స్కిట్లలో కడుపుబ్బా నవ్విస్తూనే లవ్ట్రాక్ను నడిపించారు. మొదట ఆన్స్క్రీన్ రొమాన్స్గా ప్రారంభించినా.. ఆ తర్వాత నిజజీవితంలోనూ ప్రేమపక్షులుగా మారారు.
'పెళ్లే వద్దు'... అసలు నాకు పెళ్లే వద్దు అంటూ జబర్దస్త్లో డైలాగ్ కొట్టిన రాకేశ్.. ఇప్పుడు సుజాతతో కలిసి లవ్ట్రాక్ నడిపించడం ప్రారంభించాడు. 'ఈ పెళ్లితో నీకు కన్నీళ్లు రావని చెప్పను.. కష్టాలు రావని చెప్పను.. కానీ ఈ రెండూ ఉన్నప్పుడు నీ పక్కన నేను ఉంటానని మాత్రం డెఫినెట్గా చెప్తా" అంటూ ఒక్క డైలాగ్ చెప్పి సుజాత మనసును దోచాడు. ప్రస్తుతం సోషల్మీడియాలో ఎక్కడ చూసిన వీరికి సంబంధించిన విషయాలు, వీడియోలు తెగ ట్రెండింగ్ అవుతున్నాయి. ఈ నేపథ్యంలో ఈటీవీ భారత్.. ఈ జోడీతో ముచ్చటించింది. వారి ప్రేమ సంగతులను అడిగి తెలుసుకుంది. దీనిపై మాట్లాడిన రాకేశ్.. తామిద్దరు జబర్దస్త్ ద్వారానే దగ్గర అయినట్లు చెప్పాడు. తమ మధ్య బంధాన్ని వివరించాడు.
"మాది నిజమైన ప్రేమే.. ఎంతవరకు వెళ్తుందో చూడాలి. తనకు జబర్దస్త్లో చేయాలని ఆసక్తి ఉందని తెలిసి.. అప్పటికే వేరే కామెడీ షోలో చేస్తున్న తనను ఇక్కడికి తీసుకొచ్చాను. తను జబర్దస్త్లోకి వచ్చేటప్పటికే బాగా ఫేమస్. ఇక్కడ కలిసి పనిచేస్తున్న క్రమంలో మా బంధం బలపడింది. నేను ఏ పరిస్థితుల్లో ఉన్నానో తను అర్థం చేసుకోలదు. అంతకుమించిన అదృష్టం మరోటి లేదు. మనకు స్వచ్ఛమైన ప్రేమ దొరికినప్పుడు తీసుకోకపోతే మళ్లీ రాదని నా అభిప్రాయం."
- రాకింగ్ రాకేశ్
"ఇప్పుడు నన్ను ఇంటర్వ్యూ చేస్తున్నట్టే నేను కొన్నాళ్ల క్రితం హెచ్ఎంటీవీలో పనిచేస్తున్నప్పుడు రాకేశ్ని ఇంటర్వ్యూ చేశాను. దివాలీ సందర్భంగా ఓ స్పెషల్ ప్రొగ్రామ్ కోసం అతడిని పిలిచాము. అతనితో తొలిపరిచయం అప్పుడే. అలా పరిచయం కాస్త ఫ్రెండ్షిప్ అయింది. మేము ఇద్దరం ఒకరినొకరం బాగా అర్థం చేసుకోగలం. జీవితంలో మనతో తోడుగా ఉన్న ఎవరైనా సరే మన బాధ్యతలను, కష్టసుఖాలను పంచుకోవాలి. ఆ విషయంలో రాకేశ్ బెస్ట్. నన్ను అన్ని విధాలా గౌరవిస్తాడు. రాకేశ్ చాలా కష్టాలను ఎదుర్కొన్నాడు. అందరితోనూ నిజాయతీగా ఉంటాడు.. ఎలాంటి స్వార్థం ఉండదు."
- సుజాత
'క్రెడిట్ అంతా రాకేశ్దే'..: జబర్దస్త్లో తనకు ఫేం రావడానికి కారణం రాకేశే అని అంటోంది సుజాత. అంతకుముందు ఇతర ఛానెళ్లలో, షోల్లో చేసినా కూడా ఇంత స్వేచ్ఛగా తాను ఎప్పుడూ పనిచేసింది లేదని చెప్తోంది. 'నాకు జబర్దస్త్లో చేయాలని ఉందని చెప్పినప్పుడు అందుకు సరే అన్నాడు. నేను బయట చేసే స్కిట్లలో ఎలాంటి తప్పులు చేస్తున్నాను, ఎలా చేయాలి వంటి మెళకువలు చెప్పాడు. అలా నేను ఇక్కడ నిలదొక్కుకోగలిగాను. ఇప్పుడు నేను ఇక్కడ ఇలా ఉండటానికి కారణం రాకేశే' అని చెప్పింది.
ఇదీ చూడండి : 'మా బంధం ఏంటో చెప్పను.. ఏదైనా జరగొచ్చు.. ఫేక్ మాత్రం కాదు!'
