సూపర్ స్టార్ కృష్ణ మృతితో సినీ పరిశ్రమ తీవ్ర దిగ్భ్రాంతికి లోనయ్యింది. సుమారు 350 వందలకు పైగా చిత్రాలు చేసి వైవిధ్య పాత్రలతో అలరించిన ఆయన తెలుగు చలన చిత్ర పరిశ్రమలో ఓ చెరగని ముద్ర వేశారు. హీరోగా, నిర్మాతగా, దర్శకుడిగా తెలుగు సినీ పరిశ్రమకు ఎన్నో హిట్స్‌ అందించిన ఈ తార తన జీవితంలో ఎన్నో విజయాలను, రికార్డులను సొంతం చేసుకున్నారు. కానీ ఈ నాలుగు కోరికలు తీరకుండానే కన్నుమూశారు.
గౌతమ్తో కలిసి సినిమాలో..
'వన్ నేనొక్కడినే' మూవీతో కృష్ణ మనవడు గౌతమ్ కృష్ణ వెండితెరకు పరిచయం అయ్యాడు. తన మనవడితో నటించాలనుందని ఈ మూవీ ప్రమోషన్స్‌ సమయంలో, మూవీ విడుదల తర్వాత కూడా పలు సందర్భాల్లో అన్నారు. కానీ అది కుదరలేదు. మంచి కథ వస్తే మహేశ్‌తో కలిసి మరో సినిమాలో నటించాలనుకున్నారు. ఆ కోరిక కూడా తీరలేదు. అయితే కృష్ణ తన కుమారులు మహేశ్, రమేశ్‌ బాబుతో కలిసి పలు చిత్రాల్లో నటించారు.
మహేశ్ను జేమ్స్ బాండ్‌గా చూడాలనుకున్నారు..
తెలుగు తెరకు జెమ్స్‌బాండ్‌ తరహా పాత్రని పరిచయం చేసిన ఘనత సూపర్ స్టార్కే సొంతం. 'గూఢచారి 116', 'రహస్య గూఢచారి' వంటి చిత్రాల్లో నటించి ఆంధ్రా జేమ్స్ బాండ్‌గా గుర్తింపు పొందారు. తనలానే కుమారుడు మహేశ్ను కూడా జేమ్స్ బాండ్‌ పాత్రలో కనిపిస్తే చూడాలనుకున్నారు. ఇదే విషయాన్ని పలు ఇంటర్య్వూలో ఆయన పేర్కొన్నారు. మహేశ్ను ఎలాంటి పాత్రలో చూడాలనుకుంటున్నారంటూ ఓ ఇంటర్వ్యూయర్ అడిగిన ప్రశ్నకు జేమ్స్‌బాండ్‌ అని ఆయన సమాధానం ఇచ్చారు. దాంతో మహేశ్ను జేమ్స్‌బాండ్‌గా చూడాలనే కృష్ణ కోరిక తీరకుండానే మిగిలిపోయింది. కాగా మహేశ్-రాజమౌళి కాంబినేషన్లో తెరకెక్కబోయే చిత్రంలో మహేశ్ జేమ్స్‌బాండ్‌ తరహా పాత్రలో చేయనున్నట్లు వార్తలు వచ్చిన విషయం తెలిసిందే. అదే నిజమైతే కృష్ణ కోరిక తీరినట్టే.. కానీ తెరపై మహేశ్ను జేమ్స్‌బాండ్‌గా చూసి మురిసిపోవాలనుకున్న ఆ ఆశ మాత్రం అలాగే ఉండిపోయింది.
మనసు పడ్డ పాత్రలో నటించకుండానే..
తెరపై విభిన్న పాత్రలతో ప్రయోగాలు చేసిన కృష్ణకు ఛత్రపతి శివాజీగా చేయాలనేది కోరిక. అల్లూరి సీతారామరాజుగా వెండితెరపై చెరగని ముద్ర వేసుకున్న ఆయన ఆ తర్వాత మనసు పడ్డ మరో పాత్ర.. ఛత్రపతి వీర శివాజీ. చంద్రహాస సినిమాలో కృష్ణ శివాజీ పాత్రలో నటించారు. అయితే.. అది పూర్తిస్థాయి పాత్ర కాదు. కాసేపు మాత్రమే. దానికి తృప్తి చెందని కృష్ణ పూర్తి స్థాయిలో శివాజీ సినిమా చేయాలనుకున్నారట. 'అల్లూరి సీతారామరాజు' తర్వాత మహారథితో శివాజీ స్క్రిప్ట్‌ రెడీ చేయమని చెప్పారట కృష్ణ. ఆ ప్రాజెక్ట్‌ మీద కొంత వర్క్‌ కూడా చేశారు. అయితే.. ఆ సినిమా వల్ల మత ఘర్షణలు చెలరేగే అవకాశం ఉందనే సందేహం వచ్చింది. దీంతో ఈ సినిమా చేయాలనే ఆలోచనను ఆయన వెనక్కి తీసుకున్నారట. దాంతో తనకు ఇష్టమైన శివాజీ పాత్రలో కనిపించాలనే కోరిక తీరకుండానే పోయింది. ఆ తర్వాత ఆ అవకాశం కూడా ఆయనకు రాలేదు.
ఓ రియాలిటీ షోకు వ్యాఖ్యాతగా..
బాలీవుడ్‌ బిగ్‌ బీ అమితాబ్‌ బచ్చన్‌ వ్యాఖ్యాతగా వ్యవహస్తున్న రియాలిటీ షో 'కౌన్‌ బనేగా కరోడ్‌పతి'. దేశవ్యాప్తంగా ఈ షో ఎంతో క్రేజ్‌ను సంపాదించుకుంది. తెలుగులోనూ ఈ షో నాలుగు సీజన్లు పూర్తి చేసుకుంది. అయితే అప్పట్లోనే ఇలాంటి ఓ రియాలిటీ షో చేయాలన్నది ఆయన కోరిక అట. 'కౌన్‌ బనేగా కరోడ్‌పతి' చూసి ఇక్కడ కూడా అలాంటి ఓ షో చేయాలని ఆయన కోరుకున్నారట. అమితాబ్‌ వ్యాఖ్యాతగా వ్యవహరించే కేబీసీ షో చూసిన కృష్ణ.. తనకు కూడా అటువంటి షో చేయాలని ఉందని ఓ సందర్భంలో తన మనసులో మాటను బయటపెట్టారు. అటువంటి కొత్త కాన్సెప్ట్‌తో ఎవరైనా టీవీ షో ఆఫర్‌తో తన దగ్గరకు వస్తే చేస్తానన్నారు. బుల్లితెరపై షోలు చేయడానికి తనకు అభ్యంతరం లేదని కృష్ణ గతంలో తెలిపారు.
ఇదీ చదవండి:సూపర్ స్టార్ కృష్ణ రికార్డ్.. ఆ చిత్రాల్లో ఎక్కువగా నటించిన ఘనత ఆయనదే
