రోగానికి చికిత్స చేయాలంటే వ్యాధి నిర్ధారణ పరీక్షలు ఎంతో కీలకం. ఆ నివేదికలు లేనిదే వైద్యులు మాత్రలివ్వలేరు. అలాంటి టెస్టుల కోసం.. ప్రభుత్వ ఆసుపత్రుల్లో రోగులకు గంటల తరబడి నిరీక్షణ తప్పడం లేదు. కొన్నిరకాల టెస్టులకైతే రోజుల తరబడి ప్రదక్షిణలు చేయాల్సిందే. ఉస్మానియా ఆసుపత్రి (Osmania Hospital )లో ఇటీవలి వరకు ఇదే పరిస్థితి.
అత్యవసర చికిత్సల కోసం వచ్చేవారికి తొలుత అన్ని పరీక్షలు చేయాలి. మూత్ర పిండాల నుంచి కాలేయం వరకు వివిధ పరీక్షలో వాటి పనితీరు ఎలా ఉందో తెలుసుకోవాలి. దీంతో పరీక్షల్లో జాప్యం వల్ల రిపోర్టులు వచ్చేవరకు ప్రాథమిక చికిత్సలతో సరిపెట్టాల్సి వచ్చేది. అయితే.. ఇప్పుడు ఆ ఇబ్బంది తప్పింది. ఉస్మానియా అత్యవసర విభాగంలో తాజాగా.. ఆటోమేటిక్‌ బయోకెమిస్ట్రీ ఎనలైజర్‌ను అందుబాటులోకి తేవడంతో రోగులకు ఎంతో మేలు చేకూరుతోంది. పరీక్షల నివేదికలు నిమిషాల్లో వస్తుండటంతో సాధ్యమైనంత త్వరగా గోల్డెన్‌ అవర్‌లో చికిత్సలు అందిస్తున్నారు.
మొత్తం బయోకెమిస్ట్రీ పరీక్షలన్నీ ఎలాంటి జాప్యం లేకుండా చేస్తున్నారు. అతి తక్కువ సిబ్బందితోనే తక్కువ వ్యవధిలోనే నాణ్యమైన నివేదికలు అందించడానికి వీలు ఏర్పడుతోంది. రీనల్‌ ప్రొఫెల్‌, లిపిడ్‌ ఫ్రొపైల్‌, టోటల్‌ ప్రొటీన్‌, అల్యూబిమిన్‌, యూరిక్‌ యాసిడ్‌, టోటల్‌ బైలురూబిన్‌, గ్లూకోజ్‌, సోడియం, పోటాషియం, ఐరన్‌ ఇతర అన్నిరకాలు పరీక్షల నివేదికలో అందించడంలో గతంతో పోల్చితే వేగం పెరిగిందని రోగులు చెబుతున్నారు.
24 గంటల్లో 400 టెస్టులు..
ఉస్మానియాలో అన్ని విభాగాలూ కలిపి రోజుకు 1500 పరీక్షలు చేస్తుంటారు. కానీ.. ఒకటే బయోకెమిస్ట్రీ ఎనలైజర్‌ ఉండడంతో రోగులు ఇక్కట్లు ఎదుర్కొన్నారు. కొవిడ్‌ రెండోదశ తర్వాత రోగుల తాకిడి భారీగా పెరిగింది. ఉస్మానియాకు రోగులు నిత్యం 1500-1800పైనే వస్తుంటారు. వచ్చిన ప్రతి రోగికి సాధారణ రక్త, యూరిన్‌ పరీక్షలు తప్పనిసరి. లక్షణాలనుబట్టి మరికొందరికి ఇతర పరీక్షలూ చేయాల్సిందే. ఈ కారణంగా.. ఉన్న ఒకే ల్యాబ్‌పై తీవ్ర ఒత్తిడి పడేది.
శాంపిళ్లు ఇచ్చిన మరుసటి రోజుకు నివేదికలు వచ్చేవి. కొన్ని పరీక్షల్లో ఇంకా జాప్యం జరిగేది. అత్యవసర విభాగంలో టెస్టులు చేసేందుకు ప్రత్యేకంగా ఏమీ లేదు. అక్కడ శాంపిళ్లు కూడా సాధారణ ల్యాబ్‌కే పంపుతుంటారు. దీంతో.. నివేదికలకు జాప్యమయ్యేది. ఫలితంగా దూరం నుంచి వచ్చినవారు అక్కడే నిరీక్షించాల్సి వచ్చేది. ఈ విషయం ప్రభుత్వ దృష్టికి వెళ్లడంతో రెండో పరికరం కోసం వైద్య ఆరోగ్యశాఖ పచ్చజెండా ఊపింది. దీంతో రూ.60 లక్షల నిధులతో టీఎస్‌ఎంఐడీసీ అధునాతన వ్యాధి నిర్ధారణ పరికరాన్ని అమర్చారు. ఫలితంగా.. ఇప్పుడు చకచకా నివేదికలు అందుతున్నాయి.
ఇదీ చూడండి:
