Heavy Rain in Hyderabad : తెలంగాణలోని హైదరాబాద్ నగరాన్ని భారీ వర్షాలు వణికిస్తున్నాయి. అర్ధరాత్రి వేళ ఊహించని విధంగా కురిసిన వాన.. ప్రజలను అతలాకుతలం చేసింది. పాతబస్తీ, నారాయణగూడ, ఖైరతాబాద్, చంపాపేట్, దిల్సుఖ్నగర్, ఎల్బీనగర్, వనస్థలిపురం ప్రాంతాల్లో 3 గంటల పాటు ఏకధాటిగా వర్షం కురిసింది. భారీ వానలకు మూసీ ఉప్పొంగుతోంది. మూసారాంబాగ్ వంతెన పైనుంచి వరద నీరు ప్రవహిస్తోంది. ఈ క్రమంలోనే మూసారాంబాగ్ నుంచి గోల్నాక వైపు కాసేపు రాకపోకలు నిలిచిపోయాయి. మలక్పేట వంతెన కింద భారీగా వర్షం నీరు నిలిచిపోయింది. రోడ్లపై నిలిచిన వరద నీటితో వాహనదారులు అవస్థలకు గురయ్యారు.
నాంపల్లిలోని పలు కాలనీల్లోకి వరద నీరు చేరింది. పటేల్నగర్లోని సాయికృప అపార్ట్మెంట్ చెరువును తలపిస్తోంది. పలు వాహనాలు నీటిలో మునిగిపోయాయి. సరూర్నగర్, కోదండరాం నగర్తో పాటు పలు కాలనీల్లోకి భారీగా వరద నీరు చేరింది. సూరారం తెలుగుతల్లి నగర్లో మోకాళ్ల లోతు నీరు చేరింది. దీంతో రంగంలోకి దిగిన జీహెచ్ఎంసీ అధికారులు ముంపు ప్రాంతాల్లో సహాయక చర్యలను ముమ్మరం చేశారు.
రాత్రి కురిసిన వర్షానికి గాజులరామారంలోని వొక్షిత్ ఎంక్లేవ్ను వరద మరోసారి ముంచెత్తింది. చిన్నపాటి వర్షానికే ఎగువన ఉన్న పెద్ద చెరువు నిండి.. వరద నీరు కింద ఉన్న కాలనీల్లోకి చేరుతోంది. ఫలితంగా స్థానికులు తీవ్ర ఇబ్బందులకు గురవుతున్నారు. మోకాళ్ల లోతు నిల్వ ఉన్న నీటితో ఇళ్ల నుంచి బయటకు రాలేకపోతున్నారు.
నేలకొరిగిన చెట్లు..: హయత్నగర్ డివిజన్ పరిధిలోని బి.డి.ఎల్.కాలనీ జలమయమైంది. పలు చెట్లు నేలకొరిగాయి. హయత్నగర్ కార్పొరేటర్ కళ్లెం నవజీవన్ రెడ్డి, ఏఈతో కలిసి కాలనీలను సందర్శించారు. డీఆర్ఎఫ్ బృందాన్ని పిలిపించి.. సహాయక చర్యలు ప్రారంభించారు. పెద్ద అంబర్పేట్ మున్సిపాలిటీ పరిధిలోని కళానగర్లోనూ ఇలాంటి పరిస్థితులే ఉన్నాయి.
ఇటీవల ఎడతెరపిలేకుండా కురిసిన వర్షాలకు నగరంలో చెరువులన్నీ నిండుకుండల్లా మారాయి. అర్ధరాత్రి వేళ మరోసారి భారీగా కురిసిన వానలకు చెరువుల్లోకి ప్రవాహం పెరిగింది. దీంతో నగరంలోని చెరువుల పక్కన ఉన్న లోతట్టు ప్రాంతాల కాలనీలు బిక్కుబిక్కుమంటూ కాలం గడుపుతున్నాయి.
ఇవీ చూడండి..
ఈడీ విచారణకు సోనియా గాంధీ.. కాంగ్రెస్ నేతల నిరసనలు
