ఏప్రిల్‌- జూన్‌ త్రైమాసికంలో ఇండియన్‌ ఆయిల్‌ కార్పొరేషన్‌ (ఐఓసీ), భారత్‌ పెట్రోలియమ్‌ కార్పొరేషన్‌ (బీపీసీఎల్‌), హిందుస్థాన్‌ పెట్రోలియమ్‌ కార్పొరేషన్‌ (హెచ్‌పీసీఎల్‌)లు సంయుక్తంగా రూ.10,700 కోట్ల మార్కెటింగ్‌ నష్టాన్ని చవిచూసే అవకాశం ఉందని ఐసీఐసీఐ సెక్యూరిటీస్ అంచనా వేసింది. 'ఏప్రిల్‌- జూన్‌లో ముడి చమురు ధరలు పెరిగాయి. దానికి తగ్గట్లుగా పెట్రోలు, డీజిల్ ధరలను సవరించకపోవడంతో, చమురు మార్కెటింగ్‌ సంస్థలు నష్టాలు చవిచూడాల్సి రావచ్చు. ముడి చమురు శుద్ధి చేసి పెట్రోలు, డీజిల్‌గా మార్చే రిఫైనరీలను ఈ సంస్థలు నిర్వహిస్తున్నాయి. చమురు శుద్ధి మార్జిన్‌లు అధికంగానే నమోదైనా, ఆ ప్రయోజనమూ కనిపించకపోవచ్చ'ని ఆ నివేదిక పేర్కొంది. ప్రతి లీటరు పెట్రోల్-డీజిల్‌పై రూ.12-14 మేర ఈ కంపెనీలు నష్టపోవచ్చని పేర్కొంది. దేశవ్యాప్తంగా పెట్రోలు, డీజిల్ విక్రయాల్లో ఐఓసీ, బీపీసీఎల్‌, హెచ్‌పీసీఎల్‌ వాటానే 90 శాతం వరకు ఉంటుంది.
'ఒక బ్యారెల్‌ ముడిచమురుపై స్థూల రిఫైనింగ్‌ మార్జిన్‌ 17-18 డాలర్లుగా (నిల్వలపై బ్యారెల్‌కు 0.1- 0.2 డాలర్ల నష్టాన్ని పరిగణనలోకి తీసుకుని) ఉండొచ్చని అంచనా వేస్తున్నాం. అమ్మకాల్లో 17-20 శాతం వృద్ధి ఉండొచ్చు. అయితే పెట్రోలు, డీజిల్ విక్రయాల ద్వారా, అధిక నష్టాల వల్ల మొదటి త్రైమాసికంలో ఎబిటా నష్టం రూ.6,600 కోట్లుగాను, నికర నష్టం రూ.10,700 కోట్లుగా నమోదుకావచ్చ'ని నివేదిక పేర్కొంది. 2-3 రోజులుగా ముడి చమురు ధర దిగిరావడం వల్ల మున్ముందు విక్రయాలపై నష్టాల విషయంలో కొంత ఉపశమనం లభిస్తుందని పేర్కొంది. ఇదే సమయంలో స్థూల రిఫైనింగ్‌ మార్జిన్‌ కూడా తగ్గుతుండటంతో 2022-23 ఆర్థిక సంవత్సరానికి, ఈ సంస్థలకు ఆదాయం పరిమితం కావొచ్చని పేర్కొంది.
రిలయన్స్‌కు కలిసి వస్తోంది: రిలయన్స్‌ ఇండస్ట్రీస్‌కు కార్యకలాపాల పరంగా, ఆర్థిక పనితీరు పరంగా ఏప్రిల్‌- జూన్‌ బలమైన త్రైమాసికంగా ఉంటుందని వివరించింది. ఏకీకృత ఎబిటా, పన్ను అనంతర లాభం వరుసగా 67 శాతం, 77 శాతం వృద్ధితో రూ.38,900, రూ.24,400 కోట్లుగా నమోదయ్యే అవకాశం ఉందని వివరించింది. ఆ సంస్థ చరిత్రలోనే ఇది అత్యధికమని పేర్కొంది. అయితే 2022 జులై 1 నుంచి ఇంధన ఎగుమతులపై సుంకం అమల్లోకి రావడంతో, రాబోయే తొమ్మిది నెలల్లో కంపెనీ ఆదాయాలపై ప్రభావం పడొచ్చని వివరించింది.
ఇదీ చదవండి:
