కరోనాతో భారీగా నష్టపోయిన వాటిల్లో విమానయాన రంగం కూడా ప్రధానంగా ఉంది. ఈ నేపథ్యంలో అంతర్జాతీయంగా చాలా విమాన సంస్థలు ఖర్చులు తగ్గించుకునే పనిలోపడ్డాయి. ఇందులో భాగంగా ఉద్యోగులను తొలగించుకోవడం వంటి చర్యలు చేపట్టాయి. ఇప్పుడు ఈ జాబితాలో ఫ్రాన్స్కు చెందిన ఎయిర్ ఫ్రాన్స్ దాని ప్రాంతీయ అనుబంధ సంస్థ హాప్లు చేరాయి.
ఉద్యోగాల కోత ఇలా..
కరోనాతో ఎదురైన సంక్షోభం కారణంగా ఈ రెండు సంస్థలు 7,500 మంది ఉద్యోగులను (ఎయిర్ ఫ్రాన్స్ 6,500 మంది, హాప్ 1,000 మంది) తొలగించనున్నట్లు ప్రకటించాయి. ప్రస్తుతం ఎయిర్ఫ్రాన్స్లో 41,000 మంది, హాప్లో 2,400 మంది ఉద్యోగులు ఉన్నారు.
ఎయిర్ ఫ్రాన్స్ ప్రకటనతో 'ఛార్లెస్ డి గాల్లే ఎయిర్పోర్ట్' లోని ఎయిర్ ఫ్రాన్స్ ప్రధాన కార్యాలయం వద్ద పలు ఉద్యోగ సంఘాలు నిరసనకు దిగాయి.
ఈ ఉద్యోగాల కోత దేశ ఆర్థిక వ్యవస్థపై ప్రభావం చూపుతుందని నిరసనకారులు హెచ్చరించారు. అలాంటి పరిణామాలు ఎదురవకుండా, ఉద్యోగాల కోత లేకుండా సంస్థను గట్టెక్కించేందుకు ఉన్న నిధులను ఉపయోగించి.. ప్రత్యామ్నాయాలపై దృష్టి సారించాలని సూచించారు.
ఈ విషయంపై యూనియన్లతో చర్చించిన ఎయిర్ ఫ్రాన్స్ 2022 వరకు 7,500 మంది ఉద్యోగులను తగ్గించుకుంటామని వెల్లడించింది.
ఇదీ చూడండి:ఆ ఉబర్ కార్యాలయం శాశ్వతంగా మూసివేత!
