A Son died Due to Kidney Issue : ఆ దంపతులకు వరుసగా ముగ్గురు కుమార్తెలు. తర్వాతి సంతానంలో కుమారుడు జన్మించాడు. ఆ కుర్రాడిని ఆ తల్లి అల్లారు ముద్దుగా పెంచి పోషించింది. అనంతరం యుక్త వయస్సుకు రాగానే వివాహం జరిపించారు. ప్రస్తుతం ఆ యువకుడికి భార్య, తొమ్మిదేళ్ల కుమారుడు, అయిదేళ్ల కూతురు ఉన్నారు. సాఫీగా సాగిపోతున్న జీవితాన్ని ఒక్క సారిగా కిడ్నీ సంబంధిత వ్యాధి కుదిపేసింది. తనయుడి అనారోగ్యాన్ని చూసి తట్టుకోలేక ఆ తల్లి తల్లడిల్లిపోయింది. డాక్టర్లు కిడ్నీ మార్పిడి శస్త్ర చికిత్స చేయాలన్నారు. వెంటనే కొడుకు కంటే తనకేదీ ఎక్కువ కాదనుకొని, అతడి జీవితాన్ని నిలబెట్టేందుకు తన కిడ్నీని సైతం దానం చేసింది తల్లి సత్తెమ్మ.
కిడ్నీ దానం చేసిన తల్లి : చికిత్స చేసిన అనంతరం కుమారుడు ఏడాదిపాటు బాగానే ఉన్నాడు. అతడు తర్వాత మళ్లీ అనారోగ్యానికి గురయ్యాడు. ఆసుపత్రిలో చేర్పించినా ఫలితం లేక మృతి చెందాడు. కొడుకు మరణం తట్టుకోలేని తల్లి, భార్యాపిల్లలు దుఃఖ సాగరంలో మునిగారు. స్థానికుల కథనం ప్రకారం కరీంనగర్ జిల్లాలోని పాలకుర్తి మండలం పుట్నూరు గ్రామానికి చెందిన లక్ష్మయ్య, సత్తెమ్మ దంపతుల కుమారుడు రాము (35). రాము కిడ్నీ సంబంధిత వ్యాధికి గురయ్యారు. ఆ మధ్యలో డయాలసిస్‌తో కొంత ఉపశమనం పొందారు. ఆ తర్వాత కిడ్నీ మార్పిడి చేయించుకోవాలని వైద్యులు సూచించారు. కుటుంబ ఆర్థిక పరిస్థితి దృష్ట్యా వారు అంతంత మాత్రంగానే ఉన్నారు. దీంతో తల్లి సత్తెమ్మ తన కిడ్నీని కొడుకుకు దానం చేసింది.
పెద్ద దిక్కు కోల్పోయిన సత్తెమ్మ కుటుంబం : తల్లి కిడ్నీని అమర్చాక రాము మొదటి ఏడాదిపాటు బాగానే ఉన్నారు. కొన్ని రోజుల క్రితం ఇన్‌ఫెక్షన్‌ కారణంగా రాము మరోసారి అనారోగ్యానికి గురయ్యారు. హైదరాబాద్‌ పంజాగుట్టలోని నిమ్స్‌ (నిజాం ఇన్సిట్యూట్ ఆఫ్ మెడికల్ సైన్సెస్)లో చేర్చగా చికిత్స పొందుతూ శుక్రవారం (నవంబర్ 15)న మృతి చెందారు. నాలుగేళ్ల క్రితమే భర్త లక్ష్మయ్య మృతిచెందడం, ఇప్పుడు ఉన్న ఏకైక కుమారుడు దూరమడంతో సత్తెమ్మ విలపిస్తున్న తీరు స్థానికుల హృదయాలను కలచివేసింది. సత్తెమ్మ కుటుంబం పెద్దదిక్కును కోల్పోయినందున ప్రభుత్వం, దాతలు సాయం చేయాలని గ్రామస్థులు కోరుతున్నారు.
'లాలూ ప్రసాద్కు కిడ్నీ ఇచ్చిన కుమార్తె.. ఆపరేషన్ సక్సెస్'
కేంద్రం నివేదిక: అవయవాలు కావాల్సిన వారు లక్షల్లో.. దాతలు వేలల్లో
