నష్టాల్లో కూరుకుపోయిన ప్రభుత్వ రంగ విమానయాన సంస్ధ ఎయిర్ ఇండియాను.. టాటా సన్స్ సొంతం చేసుకుంది. ఈ విషయాన్ని కేంద్రం అధికారికంగా వెల్లడించింది. ఈ సంస్థను దక్కించుకునేందుకు చాలా సంస్థలు బిడ్లు దాఖలు చేయగా.. టాటా సన్స్ దాఖలు చేసిన బిడ్‌ అన్నింటికంటే ఆకర్షణీయంగా ఉందని కేంద్ర పెట్టుబడులు, ప్రభుత్వ ఆస్తుల నిర్వహణ విభాగం (డీఐపీఎం) కార్యదర్శి తుహిన్‌కాంత పాండే తెలిపారు.
ఈ నెల ఆరంభంలోనే ఎయిర్ఇండియాను టాటా సన్స్ దక్కించుకున్నట్లు వార్తలు వచ్చాయి. అయితే ప్రభుత్వం ఆ వార్తలు అవాస్తవమని ఖండించింది. చివరకు ఆ అంచనాలన్నీ నిజమయ్యాయి.
ఎయిర్ఇండియా సొంత గూటికి చేరడంపై టాటా సన్స్ గౌరవ ఛైర్మన్ రతన్ టాటా హర్షం వ్యక్తం చేశారు. 'వెల్కం బ్యాక్ ఎయిర్ఇండియా' అనే క్యాప్షన్తో.. జేఆర్డీ టాటా, పాత ఎయిర్ఇండియా వద్ద దిగిన ఓ ఫొటోతో కూడిన ఓ డాక్యుమెంట్ను ట్విట్టర్లో షేర్ చేశారు.
