గోఎయిర్ విమానయాన సంస్థ నూతన ముఖ్య కార్యనిర్వహణ అధికారిగా(సీఈఓ) వినయ్ దూబె శుక్రవారం నియామకమయ్యారు. ఇప్పటి వరకు గో ఎయిర్లో సలహాదారుడిగా పని చేశారు దూబె. గత ఏడాది మే నెలలో జెట్ ఎయిర్వేస్ బాధ్యతల నుంచి తప్పుకున్న ఆయన.. అనంతరం గో ఎయిర్లో చేరారు. దూబె ఇంతకుముందు డెల్టా ఎయిర్ లైన్స్లో ఆసియా పసిఫిక్ విభాగం ఉపాధ్యక్షుడిగా, డెల్టా టెక్నాలజీలో సీఈఓగా విధులు నిర్వహించారు.
గో ఎయిర్ బోర్డు సభ్యులు దూబెను సీఈఓగా నియమించడానికి ఆమోదం తెలిపినట్లు ఆ సంస్థ చైర్మన్ మేనేజింగ్ డైరెక్టర్ జే వాడియా ప్రకటించారు. కొర్నెలీజ్ వ్రీస్విజ్ సీఈఓగా బాధ్యతల నుంచి తప్పుకున్న తర్వాత ఇంతవరకు ఆ స్థానం ఖాళీగానే ఉంది.
20వేల మందికి పైగా ఉద్యోగులున్న గో ఎయిర్ సీఈఓ విధులను సమర్థంగా నిర్వహించి, కంపెనీ లక్ష్యాలు సాధించటం కోసం దూబె కృషి చేస్తారని వెల్లడించారు సంస్థ నిర్వాహకులు.
ఇదీ చూడండి: వారం రోజుల్లో 10వేల కోట్లు చెల్లిస్తాం: ఎయిర్టెల్
