ఆర్థిక వ్యవస్థను గాడినపెట్టేందుకు స్వదేశీ వస్తువులనే వినియోగించాలని ఆర్థిక ప్యాకేజీ ప్రకటనలో భాగంగా దేశప్రజలను కోరింది కేంద్రం. ఆ దిశగా చైనా ఉత్పత్తులను బహిష్కరించేందుకు నడుం బిగించింది అఖిల భారత వ్యాపారుల సమాఖ్య (సీఏఐటీ). జూన్ 10 నుంచి దేశవ్యాప్త ప్రచారానికి శ్రీకారం చుట్టింది.
తూర్పు లద్దాక్లోని సరిహద్దులో ఇరుదేశాల మధ్య ఉద్రిక్తతలు కొనసాగుతున్న తరుణంలో వ్యాపార సమాఖ్య ఈ నిర్ణయం తీసుకోవడం ప్రాధాన్యం సంతరించుకుంది.
సీఏఐటీలో 7 కోట్లమందికి పైగా వ్యాపారులు, 40 వేల వ్యాపార సంఘాలు ఉన్నాయి. ఈ ప్రచారంలో భాగంగా వ్యాపారులు చైనా ఉత్పత్తులను విక్రయించకుండా అవగాహన కల్పించనుంది సమాఖ్య. అంతేకాదు వినియోగదారులు చైనా ఉత్పత్తుల స్థానంలో దేశీయ ఉత్పత్తులను కొనుగోలు చేయాలని కోరనుంది. దీని ద్వారా ప్రధానమంత్రి నరేంద్ర మోదీ 'వోకల్ ఫర్ లోకల్' పిలుపు కూడా సాకారమవుతుందని ఓ ప్రకటనలో తెలిపింది.
" ప్రభుత్వ 'మేక్ ఇన్ ఇండియా' కార్యక్రమానికి మద్దతుగా గత నాలుగేళ్లుగా చైనా ఉత్పత్తులను బహిష్కరించాలని ఎప్పటికప్పుడు ప్రచారం చేపడుతున్నాం. ఆ చర్యతో చైనా నుంచి దిగుమతులు 2017-18 ఆర్థిక ఏడాది (76 బిలియన్ డాలర్లు)తో పోలిస్తే ప్రస్తుతం 70 బిలియన్ డాలర్లకు తగ్గాయి. దిగుమతుల్లో తగ్గుదల స్వదేశీ ఉత్పత్తుల వాడకం పెరగటం, వినియోగదారుల ఆలోచనల్లో మార్పును సూచిస్తోంది."
- ప్రవీణ్ ఖందేల్వాల్, సీఏఐటీ ప్రధాన కార్యదర్శి
ఇలాంటి చర్యల ద్వారా 2021 డిసెంబర్ నాటికి చైనా నుంచి దిగుమతులు మరో 13 బిలియన్ డాలర్లు తగ్గించాలని సీఏఐటీ చూస్తోందన్నారు ప్రవీణ్. స్వదేశంలో సులభంగా లభించే ఉత్పత్తుల వంటి సుమారు 3వేల చైనా వస్తువులను గుర్తించినట్లు తెలిపారు.
