బంగారం కొంటున్నారా? ఇలా అయితే మీకు మేలు..

ఫోన్ పే, పేటీఎం, గూగుల్ పే.. ఇవాళ రేపు ప్రతి ఒక్కరి స్మార్ట్ ఫోన్లో ఈ యాప్​లు దాదాపు ఖచ్చితంగా ఉంటున్నాయి. వీటిని కేవలం పేమెంట్స్ కోసమే కాకుండా ఇతర అవసరాలకు ఉపయోగించుకోవచ్చు. అందులో ఒకటి బంగారం కొనుగోలు. వీటి ద్వారా బంగారం కొంటే ఛార్జీలు ఎంత? డెలివరీకి ఛార్జీలు తీసుకుంటారా? అనే సందేహాలకు సమాధానాలు తెలుసుకుందా.

ఒకప్పుడు బంగారం కొనుగోలు, పెట్టుబడి అంటే కేవలం భౌతిక మాత్రమే జరిగేది. కానీ ఇప్పుడున్న అధునాతక సాంకేతికత యుగంలో ఈ పద్ధతి పూర్తిగా మారిపోయింది. ఇప్పుడు బంగారంపై పెట్టుబడుల విషయంలో అనేక మార్గాలున్నాయి. సులభంగా బంగారం కొనుగోలు చేసే అందుబాటులోకి వచ్చాయి.

ప్రస్తుతం ప్రతి ఒక్కరి స్మార్ట్​ఫోన్​లో ఫోన్ పే, పేటీఎం, గూగుల్ పే తదితర పేమెంట్స్ యాప్స్​ను ఉపయోగిస్తున్నారు. వీటి ద్వారా బంగారం సులభంగా ఒక్క క్లిక్​తో కొనుగోలు చేసే వీలుంటుంది. దీనికోసం ఈ యాప్స్ ఎలాంటి ఛార్జీలను వసూలు చేయటం లేదు. అయితే 3 శాతం జీఎస్​టీ మాత్రం చెల్లించాల్సి ఉంటుంది.

ఈ యాప్స్ ద్వారా 24 క్యారెట్స్ (99.9 శాతం స్వచ్ఛమైన) బంగారం కొనుగోలు చేయవచ్చు. డిజిటల్ లాకర్ రూపంలో ఈ బంగారం దాచుకోవచ్చు. ఒకవేళ భౌతిక బంగారం కావాలనుకుంటే దానికి సంబంధించిన డెలివరీ ఆప్షన్​ను కూడా యాప్స్ అందుబాటులో ఉంచుతున్నాయి.

ఈ యాప్స్ ద్వారా కేవలం కొనుగోలు మాత్రమే కాకుండా, విక్రయం కూడా చేసుకోవచ్చు. ఆ క్షణంలో ఉన్న ధరకు అనుగుణంగా బంగారం విక్రయించుకోవచ్చు.

ఈ యాప్స్ మాత్రమే కాకుండా పలు ఇతర ఫిన్​టెక్ కంపెనీలు డిజిటల్ రూపంలో బంగారం కొనుగోలుకు అవకాశం ఇస్తున్నాయి. అయితే బంగారంపై పెట్టుబడి విషయంలో డిజిటల్ గోల్డ్​తో పాటు ఇతర డిజిటల్ రూపాలు కూడా ఉన్నాయి. ఇవి యాప్స్ ద్వారా కొనుగోలు చేసినంత సులభం కాకపోయినా.. కొంత వరకు సౌకర్యంగానే ఉంటాయి.

గోల్డ్ ఈటీఎఫ్​లు..

బంగారంపై పెట్టుబడి విషయంలో ఇతర మార్గాలను చూసుకుంటే గోల్డ్ ఈటీఎఫ్​లు ప్రధానమైనవి. అయితే ఈటీఎఫ్​లలో పెట్టుబడికి డీమ్యాట్ ఖాతా తప్పకుండా ఉండాలి.

ఈటీఎఫ్ అంటే ఎక్స్ఛేంజీ ట్రేడెడ్ ఫండ్. బంగారం ఆధారంగా ఉంటే అది గోల్డ్ ఈటీఎఫ్. ఈటీఎఫ్​లను ఖచ్చితమైన ధరలకు కొనుగోలు చేయొచ్చు. గోల్డ్ ఈటీఎఫ్​లలో తక్కువ డబ్బుతో పెట్టుబడి పెట్టే అవకాశం ఉంటుంది. కనీసం ఒక ఈటీఎఫ్ కొనుగోలు చేయాల్సి ఉంటుంది. మనకు కావాల్సినప్పుడు వీటిని అమ్మి డబ్బులు పొందవచ్చు.

ఎస్​జీబీలు..

ఇది కూడా బంగారంపై పెట్టుబడికి ఒక అనువైన మార్గం. వీటిలో బంగారం ధర పెరుగుదలతో పాటు వడ్డీని కూడా పొందవచ్చు. ప్రభుత్వం తరఫున ఆర్​బీఐ ఒకటి లేదా రెండు నెలలకోసారి వీటిని విడుదల చేస్తుంది. వీటిలో వార్షికంగా 2.5 శాతం రాబడి అర్జించవచ్చు. వడ్డీని ఆరు నెలలకు ఒక సారి బ్యాంక్ ఖాతాలో జమ అవుతుంది.

ఈ బాండ్లకు ఎనిమిది సంవత్సరాల మెచ్యూరిటీ పీరియడ్‌ ఉంటుంది. ఐదు సంవత్సరాల అనంతరం పెట్టుబడిని ఉపసంహరించుకునే(ఎగ్జిట్‌ ఆప్షన్‌) అవకాశం ఉంటుంది. పెట్టుబడి వెనక్కి తీసుకోవటం లేదా మెచ్యూరిటీ పీరియడ్‌లో ఉన్న బంగారం ధర ప్రకారమే అప్పటి ధర నిర్ణీతమౌతుంది. జాతీయ బ్యాంకులు, షెడ్యూల్డ్ ప్రైవేట్ బ్యాంకులు, పోస్టాఫీసులు, స్టాక్ ఎక్స్ఛేంజీ తదితరాలు వీటిని ఆర్బీఐ నిబంధనలకు అనుగుణంగా విక్రయిస్తాయి. వీటి కొనుగోలుకు ఎలాంటి ఛార్జీలు ఉండవు. కనీసం ఒక గ్రాము కొనుగోలు చేయాల్సి ఉంటుంది. అంటే దాదాపు రూ.5వేలు కనీస పెట్టుబడి అనుకోవచ్చు.

ఇతర మార్గాలు..

గోల్డ్ మ్యూచువల్ ఫండ్లు, గోల్డ్ డిపాజిట్ స్కీమ్ లాంటి వాటి ద్వారా కూడా బంగారంపై పెట్టుబడి పెట్టువచ్చు.

ఇవీ చదవండి: