వరుసగా ఐదో సెషన్లోనూ స్టాక్ మార్కెట్లు నష్టాలను మూటగట్టుకున్నాయి. బుధవారం సెషన్లో బీఎస్ఈ-సెన్సెక్స్ 66 పాయింట్లు తగ్గి 37,668 వద్ద స్థిరపడింది. ఎన్ఎస్ఈ-నిఫ్టీ 22 పాయింట్ల నష్టంతో 11,132 వద్దకు చేరింది.
ఆరంభంలో కాస్త సానుకూలంగా స్పందించిన సూచీలు.. అమ్మకాల ఒత్తిడితో మిడ్ సెషన్ తర్వాత నష్టాల్లోకి జారుకున్నాయి. దేశ ఆర్థిక వృద్ధిపై వెలువడుతున్న ప్రతికూల అంచనాలు మదుపరుల సెంటిమెంట్ను దెబ్బతీస్తున్నట్లు విశ్లేషకులు అభిప్రాయపడుతున్నారు.
అంతర్జాతీయంగా బలహీన సంకేతాలు, సెప్టెంబర్ డెరివేటివ్ కాంట్రాక్టుల గడువు ముగింపు దగ్గర పడుతుండటం కూడా నష్టాలకు కారణంగా తెలుస్తోంది.
ఇంట్రాడే సాగిందిలా
సెన్సెక్స్ 38,140 పాయింట్ల అత్యధిక స్థాయి, 37,313 పాయింట్ల అత్యల్ప స్థాయిలను నమోదు చేసింది.
నిఫ్టీ 11,259 పాయింట్ల గరిష్ఠ స్థాయి;11,024 పాయింట్ల కనిష్ఠ స్థాయిల మధ్య కదలాడింది.
లాభనష్టాల్లోనివి ఇవే..
యాక్సిస్ బ్యాంక్, హెచ్యూఎల్, ఇన్ఫోసిస్, నెస్లే, హెచ్డీఎఫ్సీ బ్యాంక్ షేర్లు లాభపడ్డాయి.
భారతీ ఎయిర్టెల్ అత్యధికంగా నష్టాన్ని నమోదు చేసింది. టాటా స్టీల్, ఇండస్ఇండ్ బ్యాంక్, ఎన్టీపీసీ, పవర్గ్రిడ్, టీసీఎస్ షేర్లు నష్టాల్లో ప్రధానంగా ఉన్నాయి.
ఆసియా మార్కెట్లు
ఆసియాలో ఇతర ప్రధాన మార్కెట్లలో షాంఘై, సియోల్, హాంకాంగ్ సూచీలు బుధవారం స్వల్పంగా లాభపడ్డాయి. టోక్యో సూచీ మాత్రం నష్టాలతో ముగిసింది.
రూపాయి, ముడి చమురు
కరెన్సీ మార్కెట్లో రూపాయి బుధవారం స్వల్పంగా పెరిగింది. డాలర్తో పోలిస్తే మారకం విలువ ఫ్లాట్గా రూ.73.57 వద్దకు చేరింది.
ముడి చమురు ధరల సూచీ-బ్రెంట్ స్వల్పంగా 0.19 శాతం తగ్గింది. అంతర్జాతీయ మార్కెట్లో బ్యారెల్ ముడి చమురు ధర 41.64 డాలర్లుగా ఉంది.
ఇదీ చూడండి:'ఈ ఏడాది భారత వృద్ది రేటు -5.9 శాతం'
