తస్మాత్ జాగ్రత్త: ఆన్​లైన్ పేమెంట్​ చేస్తే ఇక అంతే!

ఆన్​లైన్​లో షాపింగ్ ఎవరికి ఇష్టముండదు చెప్పండి? చేతి మునివేళ్లపైనే లక్షల ఉత్పత్తులు అందుబాటులో ఉంటున్నాయి. కావాల్సిన వస్తువులు చిటికెలో ఆర్డర్ చేసేయవచ్చు. పండగల పూట ఆఫర్లు, ఆన్​లైన్ పేమెంట్​ చేస్తే అదనపు డిస్కౌంట్లు.. ఇలా ఆన్​లైన్ షాపింగ్ వైపు మొగ్గు చూపేందుకు చాలా ప్రయోజనాలే ఉన్నాయి. అయితే ఈ అవకాశాన్నే సైబర్ కేటుగాళ్లు తమకు అనుకూలంగా మలచుకుంటున్నారు. కొత్త కొత్త దారుల్లో ఆన్​లైన్ మోసాలకు పాల్పడుతున్నారు. ఈ లాక్​డౌన్​ కాలంలో వీరి ఆగడాలు మితిమీరిపోయాయి. మరి జాగ్రత్తగా ఉండేదెలా?

కరోనా కట్టడికి లాక్​డౌన్ విధించడం వల్ల మొత్తం షాపింగ్ మాళ్లు అన్నీ మూతపడిపోయాయి. దీంతో వేరే గత్యంతరం లేక ఆన్​లైన్ షాపింగ్​పైనే ఆధారపడాల్సి వస్తోంది. ఆన్​లైన్​ కొనుగోళ్లకు ప్రజలు అలవాటు పడటం వల్ల ప్రస్తుతం ఈ వ్యాపారం జోరుగా సాగుతోంది. ఒక్క క్లిక్​తో కిరాణా సరకుల నుంచి ఎలక్ట్రానిక్ వస్తువుల వరకు గుమ్మం వద్దకే తీసుకొచ్చే 'ఈ-షాపింగ్​'వైపే వినియోగదారులు మొగ్గుచూపుతున్నారు.

ఈ కొనుగోళ్లలో చాలా వరకు ఆన్​లైన్ ద్వారానే లావాదేవీలు జరుగుతున్నాయి. క్యాష్​ ఆన్​ డెలివరీ ఆప్షన్ ఉన్నా... డిస్కౌంట్లు, మరేదైనా ఆఫర్ల కోసమో.. క్రెడిట్​/డెబిట్ కార్డుల ద్వారానే డబ్బులు కట్టేస్తున్నాం. ఇక్కడే అసలు చిక్కొచ్చిపడుతోంది. ఆన్​లైన్​ వ్యాపారం ఎలాగైతే మూడు పువ్వులు ఆరు కాయలుగా సాగుతుందో... అదే విధంగా సైబర్ నేరగాళ్లు తమ మాయాజాలంతో ప్రజల్ని వలలో వేసుకోవడానికి యథేచ్ఛగా కార్యకలాపాలు సాగిస్తున్నారు. వినియోగదారుల సమాచారాన్ని చాకచక్యంగా తస్కరిస్తున్నారు.

వీరి బారిన పడ్డ అనేక మంది.. 'మేం మోసపోయాం మొర్రో' అంటూ పోలీస్ స్టేషన్ల చుట్టూ తిరుగుతున్నారు. ఈ కరోనా సంక్షోభంలో మహారాష్ట్ర సైబర్ డిపార్ట్​మెంట్​కు ఇలాంటి కేసులు వందల సంఖ్యలో వచ్చిపడ్డాయి.

ఎలా దొంగలిస్తారు?

ప్రస్తుతం డిజిటల్ లావాదేవీలు పెద్ద ఎత్తున జరుగుతున్నందున సైబర్ కేటుగాళ్లు కొత్త మార్గాల్లో నేరాలకు పాల్పడుతున్నారు. ప్రజల్ని మోసం చేసేందుకు నయా పంథా అవలంబిస్తున్నారు. ఆన్​లైన్ లావాదేవీల కోసం నూతన ప్రోగ్రామ్ కోడ్​ను రూపొందించారు. ఈ ప్రోగ్రామ్​ను ఆన్​లైన్ షాపింగ్ వెబ్​సైట్​లలో.. మభ్యపెట్టే విధంగా అమర్చుతారు.

వినియోగదారులు షాపింగ్ వెబ్​సైట్​లో తమ సమాచారం నమోదు చేయడం ఆలస్యం.. ఈ ప్రోగ్రామ్ మొత్తం డేటాను చోరీ చేసి నేరగాళ్ల చేతిలో పెడుతుంది. డెబిట్/క్రెడిట్ కార్డు పిన్​ నెంబర్లు, ఇంటర్నెట్ బ్యాంక్​ అకౌంట్ ఐడీ, పాస్​వర్డ్, సీవీవీ నెంబర్, మొబైల్​ నెంబర్లు వంటి సమాచారం మొత్తం వారికి చేరవేస్తుంది.

కేటుగాళ్లు ఈ సమాచారాన్నంతా సైబర్​ దొంగలు, హ్యాకర్లకు అమ్మేస్తారు. దీంతో సైబర్ మోసాలు ప్రారంభమవుతాయి.

మరి తప్పించుకునేదెలా?

ఆన్​లైన్​లో ఆర్థిక లావాదేవీలు నిర్వహించేటప్పుడు వినియోగదారులు చాలా జాగ్రత్తగా ఉండాలి. ఆన్​లైన్​ చెల్లింపులకు బదులు క్యాష్​ ఆన్ డెలివరీ ఎంచుకోవడం ఉత్తమం.

ఒకవేళ ఆన్​లైన్ పేమెంట్ చేసినా.. వెంటనే మీ బ్యాంకు ఖాతాలో నగదును తనిఖీ చేసుకోవాలి. ఆన్​లైన్ కొనుగోలు చేసిన మొత్తం కాకుండా ఇంకా ఎక్కువ డబ్బులు తగ్గాయో లేదో చూసుకోవాలి. దానికంటే ముందు.. ఆన్​లైన్ లావాదేవీలు చేస్తున్న వెబ్​సైట్​ సురక్షితమో కాదో నిర్ధరించుకోవాలి.

జనవరి 1 నుంచి మే వరకు ముంబయిలో 939 సైబర్​ మోసాలు నమోదయ్యాయి. ఇందులో నాలుగు కేసుల్లో కంప్యూటర్ సిస్టమ్​లపై దాడి జరిగింది. 15 నైజీరియన్ ఆన్​లైన్ మోసాలు, 212 క్రెడిక్ కార్ట్ కేసులు, 614 ఇతర ఆన్​లైన్ నేరాలు గుర్తించారు.

అందువల్ల పేమెంట్స్ చేస్తున్నప్పుడు ఆన్​లైన్ వినియోగదారులు చాలా జాగ్రత్తగా ఉండాలని నిపుణులు సూచిస్తున్నారు. అనవసర ప్రకటనల జోలికి వెళ్లకుండా, మభ్యపెట్టే పోస్టుల వలలో పడకుండా ఉండాలని చెబుతున్నారు.

ఇవీ చదవండి