తమిళనాడు చెన్నైలో సోషల్ మీడియా ఫేమ్ డ్యాన్సర్ రమేశ్ కిడ్నాప్కు గురైనట్లు కేసు పెట్టింది అతడి రెండో భార్య. 50 ఏళ్ల రమేశ్.. రోడ్డు పక్కన దుకాణాల్లో పనిచేస్తూ జీవనం సాగిస్తున్నాడు. రమేశ్కు చిన్ననాటి నుంచి డ్యాన్స్ చేయాలనే ఆసక్తి ఉంది. దీంతో అతడు తన పేరును సైతం డ్యాన్సర్ రమేశ్గా మార్చుకున్నాడు. చిన్న కార్యక్రమాల్లో డ్యాన్స్ చేస్తుండేవాడు. ఈక్రమంలోనే తన స్నేహితుల సలహాతో డ్యాన్స్ చేస్తూ ఇన్స్టాగ్రామ్లో పోస్ట్ చేశాడు. తనదైన స్టైల్లో డ్యాన్స్ చేస్తున్న రమేశ్ సోషల్ మీడియాలో పాపులర్ అయ్యాడు. టీవీల్లో ప్రసారమయ్యే డ్యాన్స్ షోల్లో సైతం పాల్గొన్నాడు. సోషల్ మీడియాలో పాపులర్గా మారడం వల్ల రమేశ్.. ఆర్థికంగా కుదురుకున్నాడు.
అయితే, ఈ సమయంలోనే తన భర్తను కిడ్నాప్ చేశారంటూ.. రెండో భార్య ఆగస్టు 16న ఇంబవల్లి పోలీస్ స్టేషన్లో ఫిర్యాదు చేసింది. ఆగస్టు 11న రంజిత్, కుమార్, జై, రాజ్కుమార్ వచ్చి.. షూట్ ఉందంటూ తన భర్తను తీసుకెళ్లగా.. మళ్లీ తిరిగి రాలేదని ఫిర్యాదులో పేర్కొంది. తన భర్తకు డ్రగ్స్ ఇచ్చి.. మొదటి భార్య చిత్రనే కిడ్నాప్ చేసిందని ఆరోపించింది. ఆమె ఇంటికి వెళ్తే.. తనను చంపుతానంటూ బెదిరించిందని చెప్పింది. దీనిపై కేసు నమోదు చేసిన పోలీసులు మొదటి భార్య చిత్రను విచారించగా.. భర్తే తన వద్దకు వచ్చాడని బదులిచ్చింది. తాను రమేశ్ 24 ఏళ్ల క్రితమే వివాహం చేసుకున్నామని.. 10 ఏళ్ల కింద విడిపోయామని చెప్పింది. తాజాగా కూతురు వివాహానికి వచ్చిన రమేశ్.. మనసు మార్చుకుని ఇక్కడే ఉండిపోయాడని తెలిపింది. అతడిని ఎవరూ కిడ్నాప్ చేయలేదని వెల్లడించింది. ఈ కేసును పులియతోప్ పోలీస్ స్టేషన్కు బదిలీ చేయగా.. దర్యాప్తు చేపట్టారు.
ఇవీ చదవండి: ఒకే ఇంట్లో ఆరు మృతదేహాలు, ఏం జరిగింది
తాజ్ ఎక్స్ప్రెస్లో బాంబు కలకలం, రెండు గంటలు వెతికిన తర్వాత
