Spicejet landing in mumbai: ప్రముఖ విమానయాన సంస్థ స్పైస్జెట్కు చెందిన విమానాలు వరుస ప్రమాదాలకు గురవుతున్నాయి. మంగళవారం ఉదయం దిల్లీ నుంచి దుబాయ్ వెళ్తున్న విమానాన్ని సాంకేతిక సమస్యలతో అత్యవసరంగా కరాచీలో ల్యాండ్ చేశారు. ఈ ఘటన మరవకముందే మరో విమానాన్ని అత్యవసర ల్యాండింగ్ చేశారు. కాండ్ల నుంచి ముంబయికి ప్రయాణిస్తున్న విమాన విండ్షీల్డ్ దెబ్బతినడం వల్ల ముంబయిలో ల్యాండ్ చేశారు.
ఈ ఘటనపై స్పైస్జెట్ స్పందించింది. విండ్షీల్డ్ దెబ్బతినడం వల్ల పైలట్లు అత్యవసరంగా ల్యాండ్ చేశారని.. ప్రయాణికులు సురక్షితంగా ఉన్నారని తెలిపింది. ఒకే రోజులో రెండు ఘటనలు జరిగాయని.. గత 17 రోజుల్లో ఇది ఏడో ప్రమాదమని అధికారులు చెప్పారు. ఈ ఘటనలపై విచారణ చేపట్టినట్లు డైరెక్టరేట్ జనరల్ ఆఫ్ సివిల్ ఏవియేషన్(డీజీసీఏ) తెలిపింది.
మంగళవారం ఉదయం.. దిల్లీ నుంచి దుబాయ్ వెళ్తున్న స్పైస్జెట్ విమానాన్ని పాకిస్థాన్లోని కరాచీకి మళ్లించాల్సి వచ్చింది. ఫ్యూయల్ ఇండికేటర్ సరిగా పనిచేయకపోవడమే ఇందుకు కారణం. స్పైస్జెట్కు చెందిన ఎస్జీ-11 విమానం 150 మంది ప్రయాణికులతో దిల్లీ నుంచి దుబాయ్కు బయలుదేరింది. అయితే.. ఫ్యూయల్ ఇండికేటర్ పనిచేయడం లేదని గుర్తించిన పైలట్లు.. ముందు జాగ్రత్తగా విమానాన్ని ల్యాండ్ చేయాలని భావించారు. దగ్గర్లోని కరాచీ ఎయిర్పోర్ట్ ఏటీసీని సంప్రదించారు. వారి సూచనల మేరకు విమానాన్ని ల్యాండ్ చేశారు.
ఇదీ చదవండి: రాజ్యాంగంపై మంత్రి వివాదాస్పద వ్యాఖ్యలు.. లైట్ తీసుకోమన్న అధికార పార్టీ!
