ఉత్తర్ప్రదేశ్లోని ముజఫర్నగర్లో ఓ ఆశ్చర్యకరమైన ఘటన వెలుగులోకి వచ్చింది. ఓ వ్యక్తి కడుపులో నుంచి ఏకంగా 63 స్పూన్లను వెలికితీశారు వైద్యులు. ప్రస్తుతం అతడి పరిస్థితి విషమంగా ఉందని వైద్యులు తెలిపారు. అయితే అతడి కడుపులోకి అన్ని స్పూన్లు ఎలా వెళ్లాయన్న విషయంపై అనుమానాలు తలెత్తుతున్నాయి.
వివరాల్లోకి వెళ్తే.. మన్సూరాపూర్ పోలీస్స్టేషన్ పరిధిలోని బోపాడా గ్రామానికి చెందిన విజయ్ అనే వ్యక్తి మత్తు పదార్థాలకు బానిసయ్యాడు. అతడికి ఆ అలవాటును మాన్పించేందుకు కుటుంబసభ్యులు విజయ్ని షామ్లీలోని డ్రగ్ డీఅడిక్షన్ సెంటర్లో చేర్పించారు. అక్కడ ఓ నెలరోజుల పాటు చికిత్స పొందాడు. డీఅడిక్షన్ సెంటర్లో ఉన్న విజయ్కి అకస్మాత్తుగా ఆరోగ్యం క్షీణించింది.
కుటుంబసభ్యులు వెంటనే ముజఫర్నగర్లోని ఓ ప్రైవేట్ ఆస్పత్రికి తరలించారు. విజయ్పకు పరీక్షలు నిర్వహించి ఆపరేషన్ చేసిన వైద్యులు షాక్కు గురయ్యారు. అతడి కడుపులో ఏకంగా 63 స్పూన్లు కనిపించాయి. ఆపరేషన్ చేసిన వైద్యులు వాటిని వెలికితీశారు. ప్రస్తుతం అతడి పరిస్థితి విషమంగా ఉంది. అయితే ఈ స్పూన్లు అతని కడుపులోకి ఎలా వచ్చాయని వైద్యులు ఆరా తీస్తున్నారు. డ్రగ్ డీఅడిక్షన్ సెంటర్ సిబ్బందే విజయ్కి బలవంతంగా స్పూన్లు తినిపించారని కుటుంబ సభ్యులు ఆరోపిస్తున్నారు. ఈ విషయంపై విజయ్ ఎంటువంటి ఫిర్యాదు చేయలేదు.
ఇదీ చదవండి: పీఎఫ్ఐను నిషేధించిన కేంద్రం.. ఉపా చట్టం కింద ఐదేళ్లు బ్యాన్
