Squirrel Monkeys: తమిళనాడు చెన్నైలోని వాండలూర్ అన్నా జూ పార్క్లో అపహరణకు గురైన రెండు స్క్విరెల్ జాతి కోతులను రక్షించారు అధికారులు. ఈ నేరానికి పాల్పడిన ఇద్దరిని అరెస్టు చేశారు. వారిలో ఒకరు జూ తాత్కాలిక సిబ్బంది కూడా ఉన్నట్లు తెలిపారు.
ఈ ఘటనతో జూ పార్క్లో భద్రతను కట్టుదిట్టం చేశారు అధికారులు. రాత్రి వేళ గస్తీని పెంచారు.
కంచె తెంచి..
ఇనుప కంచెకు రంద్రం చేసి కోతులను ఎత్తుకెళ్లినట్లు గుర్తించిన అధికారులు ఫిబ్రవరి 8న పోలీసులకు ఫిర్యాదు చేశారు. దీంతో గాలింపు చర్యలను ముమ్మరం చేసిన పోలీసులు.. ఆ సమయంలో జూలో అనుమానాస్పదంగా తిరిగిన వ్యక్తిని అదుపులోకి తీసుకొని ప్రశ్నించారు. అతడికి ఓ జూ సిబ్బంది సహకరించినట్లు గుర్తించారు.
ఈ కోతులకు భారీ డిమాండ్..
ఈ రెండు మగ స్క్విరెల్ కోతులను 2018లో చెన్నై విమానాశ్రయంలో స్వాధీనం చేసుకున్నారు. దక్షిణాఫ్రికా నుంచి వచ్చిన స్మగ్లర్ల నుంచి వీటిని స్వాధీనం చేసుకుని జూపార్క్కు తరలించారు. ఈ అరుదైన కోతులకు ప్రపంచ మార్కెట్లో భారీ డిమాండ్ ఉందని అధికారులు తెలిపారు.
ఇదీ చూడండి: 'సైకో' ఉడత బీభత్సం.. ఊరంతా భయంభయం.. చివరకు మరణ శిక్ష!
