దిల్లీలో అమానవీయ ఘటన జరిగింది. పదేళ్ల బాలికపై సామూహిక అత్యాచారానికి పాల్పడ్డారు కామాంధులు. బాధితురాలు చదువుతున్న పాఠశాల అటెండర్, అతడి సహచరులతో కలసి ఈ దారుణానికి ఒడిగట్టాడు. అటెండర్ను అరెస్టు చేసినట్లు పోలీసులు తెలిపారు. మిగతా నిందితుల కోసం గాలిస్తున్నట్లు తెలిపారు. బాధితురాలిని లాల్ బహదూర్ శాస్త్రి ఆసుపత్రికి తరలించి వైద్య పరీక్షలు నిర్వహించి.. కౌన్సిలింగ్ ఇచ్చామని పోలీసులు వెల్లడించారు.
పోలీసులు తెలిపిన వివరాలు ప్రకారం.. బాధితురాలు.. దిల్లీలోని మున్సిపల్ పాఠశాలలో 5వ తరగతి చదువుతోంది. అదే పాఠశాలలో గత పదేళ్లుగా అజయ్(54) అనే వ్యక్తి అటెండర్గా పనిచేస్తున్నాడు. అయితే మార్చి 14న బాలికను నిర్మానుష్య ప్రదేశానికి తీసుకెళ్లాడు అజయ్. మత్తుమందు ఇచ్చి.. తన ముగ్గురు సహచరులతో కలిసి బాలికపై అత్యాచారానికి పాల్పడ్డాడు. అనంతరం అక్కడే వదిలేసి పరారయ్యాడు. ఆ రోజు నుంచి బాలిక పాఠశాలకు వెళ్లలేదు. వార్షిక పరీక్షలకు కూడా హాజరు కాలేదు. బాధితురాలు స్కూల్కు రాకపోవడం గురించి.. ఆమె టీచర్ ఆరా తీసింది. బాధితురాలి సోదరుడు.. బాలికకు ఆరోగ్యం బాగోలేదని టీచర్కు తెలిపాడు. దీంతో బాలిక తల్లిని సంప్రదించింది ఉపాధ్యాయురాలు.
మొదట్లో.. బాలికకు విరేచనాలు అవ్వడం వల్ల కడుపునొప్పితో బాధపడుతోందని ఆమె తల్లి తెలిపింది. ఆ తర్వాత జరిగిన విషయం చెప్పింది. నిందితుడిపై పోలీసులకు ఫిర్యాదు చేయాలని టీచర్.. బాలిక తల్లిదండ్రులకు సూచించింది. కానీ వారు పోలీసులకు, పాఠశాల యాజమాన్యానికి ఫిర్యాదు చేయడానికి ఇష్టపడలేదు. దీంతో, పాఠశాల ప్రిన్సిపాల్ జోనల్ అధికారులకు సమాచారం అందించారు. ఈ ఘటనపై దర్యాప్తు చేసిన పోలీసులు.. అటెండర్ను నిందితుడిగా గుర్తించారు. నిందితుడిని పోలీసులు అరెస్ట్ చేశారు. పరారీలో ఉన్న నిందితుడి కోసం గాలిస్తున్నారు.
ఈ విద్యార్థినిపై సామూహిక అత్యాచార ఘటనపై దిల్లీ మహిళా కమిషన్(డీసీడబ్ల్యూ) తీవ్రంగా స్పందించింది. దిల్లీ పోలీసులు, మున్సినపల్ కార్పొరేషన్కు నోటీసులు జారీచేశారు డీసీడబ్ల్యూ చీఫ్ స్వాతి మలివాల్. నిందితులపై కఠిన చర్యలు తీసుకోవాలని పోలీసులను ఆదేశించారు.స్కూల్లో కూడా ఆడపిల్లకి భద్రత లేకపోతే ఎలా అని ఆమె ప్రశ్నించారు. కాగా, ఈ ఘటన గురించి సత్వరమే ఉన్నతాధికారులకు తెలియజేయనుందుకు పాఠశాల ప్రిన్సిపల్, బాలిక క్లాస్ టీచర్కు దిల్లీ మున్సిపల్ కార్పొరేషన్ షోకాజ్ నోటీసులు జారీచేసింది.
నవజాత శిశువును అమ్మేసిన తల్లి..
ఝార్ఖండ్లో హృదయవిదారక ఘటన జరిగింది. అప్పుడే పుట్టిన నవజాత శిశువును రూ.4.5 లక్షలకు అమ్మేసింది ఓ తల్లి. ఈ ఘటన ఛత్రా జిల్లాలో జరిగింది. సమాచారం అందుకున్న పోలీసులు 24 గంటల్లో కేసును ఛేదించారు. పసికందును అమ్మేసిన మహిళను ఆశా దేవిగా గుర్తించారు. ఆమెతో సహా 11 మందిన పోలీసులు అరెస్టు చేశారు. ఆశా దేవి వద్ద రూ.లక్ష సీజ్ చేశారు.
పోలీసులు తెలిపిన వివరాల ప్రకారం.. ఛత్రా, బొకరో ప్రాంతాలకుకు చెందిన ఇద్దరు మధ్యవర్తులతో.. చిన్నారి కోసం బడ్కాగాన్ అనే గ్రామానికి చెందిన దంపతులు డీల్ కుదుర్చుకున్నారు. బాలుడిని అప్పగించగానే మధ్యవర్తులకు రూ.4.5 లక్షలు ముట్టజెప్పారు ఆ దంపతులు. ఆ మధ్యవర్తులు.. చిన్నారి తల్లికి రూ.లక్ష ఇచ్చి.. మిగతా డబ్బులు వారు తీసుకున్నారు. సర్దార్ ఆస్పత్రి సూపరింటెండెంట్ డాక్టర్ మనీశ్ లాల్ ఇచ్చిన ఫిర్యాదు మేరకు ఛత్రా పోలీసులు కేసు నమోదు చేశారు.
