దిల్లీ మద్యం కుంభకోణం కేసులో కేంద్ర దర్యాప్తు సంస్థ అడిగే ప్రశ్నలకు నిజాయితీగా సమాధానాలు చెబుతానని దిల్లీ ముఖ్యమంత్రి అరవింద్ కేజ్రీవాల్ స్పష్టం చేశారు. తాను ఏ తప్పూ చేయలేదు కాబట్టి.. దాచిపెట్టేందుకు ఏమీ లేదని ఆదివారం అన్నారు. తన అరెస్ట్కు బీజేపీ ఆదేశాలు ఇచ్చిందని, సీబీఐ వాటిని తప్పక పాటిస్తుందని ఆరోపించారు. దిల్లీ మద్యం పాలసీలో అవకతవకలపై సీబీఐ విచారణకు హాజరయ్యే ముందు కేజ్రీవాల్ వీడియో సందేశం విడుదల చేశారు. ఈ సందర్భంగా బీజేపీ నేతృత్వంలోని కేంద్ర ప్రభుత్వంపై విమర్శలు గుప్పించారు.
"నేను అవినీతిపరుడినని అంటున్నారు. నేను డబ్బు సంపాదించాలని అనుకుంటే ఐటీ శాఖలో కమిషనర్గా పనిచేసినప్పుడు కోట్లు వెనకేసుకునేవాడిని. అరవింద్ కేజ్రీవాల్ అవినీతిపరుడు అయితే.. ప్రపంచంలో మరెవరూ నిజాయితీపరులు కాదన్నట్లే. వారు (బీజేపీ) చాలా శక్తిమంతమైన వ్యక్తులు. ఎవరినైనా జైలుకు పంపించగలరు. నన్ను అరెస్ట్ చేయాలని బీజేపీ నేతలు సీబీఐని డిమాండ్ చేస్తున్నారు. నా అరెస్ట్ కోసం బీజేపీ ఇప్పటికే ఆదేశాలు జారీ చేసి ఉండొచ్చు. బీజేపీ ఆదేశాలను సీబీఐ తప్పక పాటిస్తుంది. ఆదేశాలు ఇచ్చేది బీజేపీ అయితే ఇక సీబీఐ ఎందుకు? సీబీఐ నన్ను అరెస్ట్ చేస్తుంది. దేశాన్ని, భరతమాతను ప్రేమిస్తా. దేశం కోసం జీవితాన్ని కూడా అర్పిస్తా."
-అరవింద్ కేజ్రీవాల్, దిల్లీ ముఖ్యమంత్రి
కేజ్రీవాల్ వెంట పంజాబ్ సీఎం భగవంత్ మాన్ సైతం సీబీఐ కార్యాలయానికి వెళ్లనున్నారు. కేజ్రీవాల్ను సీబీఐ ప్రశ్నించనున్న నేపథ్యంలో రాజధానిలో ఆమ్ ఆద్మీ పార్టీ నిరసనలకు పిలుపునిచ్చింది. ముందుజాగ్రత్తగా పోలీసులు కట్టుదిట్టమైన భద్రతా ఏర్పాట్లు చేశారు. వెయ్యి మందికి పైగా దళాలతో పటిష్ఠ బందోబస్తు ఏర్పాటు చేశారు. సీబీఐ ప్రధాన కార్యాలయం పరిసరాల్లో 144 సెక్షన్ విధించారు. నలుగురు కన్నా ఎక్కువ మంది ఒక్క చోట ఉండకూడదని పోలీసులు స్పష్టం చేశారు. ఆప్ కార్యాలయం వద్ద కూడా సెక్యూరిటీని కట్టుదిట్టం చేశారు.
సీబీఐ అడిగే అవకాశం ఉన్న ప్రశ్నలు ఇవే!
దిల్లీ మద్యం విధానానికి సంబంధించి కేజ్రీవాల్ను సీబీఐ పలు కీలక ప్రశ్నలు అడగనున్నట్లు తెలుస్తోంది. లిక్కర్ పాలసీని రూపొందించడానికి ఏ ప్రక్రియ అనుసరించారనే విషయంపై ఆరా తీయనున్నట్లు సమాచారం. మంత్రివర్గం వద్దకు వచ్చిన మద్యం విధానం ఫైలు ఎలా అదృశ్యమైందని ప్రశ్నించే అవకాశం ఉంది. కొత్త ఎక్సైజ్ పాలసీ రూపకల్పనలో ముఖ్యమంత్రిగా కేజ్రీవాల్ పాత్ర ఏంటని అడిగే అవకాశం ఉంది. దక్షిణాది లాబీకి అనుకూలంగా లిక్కర్ పాలసీ ఉందన్న ఆరోపణలపై అభిప్రాయం చెప్పాలని అడగనున్నట్లు సంబంధిత వర్గాలు చెబుతున్నాయి. వీటిపై కేజ్రీవాల్ చెప్పే సమాధానాలను బట్టి విచారణపై సీబీఐ ముందుకెళ్లే అవకాశం ఉంది.
ఇదీ చదవండి:
సీబీఐ విచారణకు అరవింద్ కేజ్రీవాల్.. అరెస్ట్ చేస్తారా?
