కర్ణాటకలోని హోసకోటేలో అమానవీయ ఘటన జరిగింది. భార్యపై అనుమానం పెంచుకున్న ఓ భర్త.. అత్యంత కిరాతకంగా ఆమెపై దాడి చేశాడు. 15 సార్లు కత్తితో పొడిచి హత్య చేశాడు. అనంతరం అతడు ఆత్మహత్యకు యత్నించాడు. నిందితుడు ఆస్పత్రిలో చికిత్స పొందుతున్నాడు. శనివారం జరిగిందీ ఘటన.
పోలీసులు తెలిపిన వివరాల ప్రకారం..
హోసకోటేకు చెందిన రమేశ్, అర్పిత.. ఏడేళ్ల క్రితం ప్రేమ వివాహం చేసుకున్నారు. వీరికి ఆరేళ్ల కుమారుడు, నాలుగేళ్ల కుమార్తె ఉంది. అయితే గత ఏడాదిగా వీరి మధ్య గొడవలు జరుగుతున్నాయి. ఈ క్రమంలోనే విడాకులు తీసుకుందామని దంపతులిద్దరూ నిర్ణయించుకున్నారు. అప్పటి నుంచి వేర్వేరుగా ఉంటున్నారు.
భర్తకు దూరమైన అర్పిత తన తల్లిదండ్రులతో కలిసి నివసిస్తోంది. కొద్ది రోజుల క్రితం నిందితుడు రమేశ్ తన భార్య అర్పితతో మాట్లాడాడు. ఇద్దరం తిరిగి కలిసి ఉందామని భార్యకు నచ్చజెప్పాడు. ఈ క్రమంలో శనివారం ఆమెను హోసకోటే ఇండస్ట్రీయల్ ప్రాంతానికి తీసుకెళ్లి.. మెడ, ఉదరభాగంపై కత్తితో 15 సార్లు పొడిచాడు. అదే కత్తితో తనను తాను పొడుచుకున్నాడు. వీరిని గమనించిన స్థానికులు.. ఇద్దరినీ ఓ ప్రైవేట్‌ ఆస్పత్రికి తరలించారు. కాగా, చికిత్స పొందుతూ బాధితురాలు అర్పిత మరణించింది.
కాళ్లు, చేతులు వేరుచేసి..
బిహార్ భోజ్పుర్లో దారుణం జరిగింది. ఓ 12 ఏళ్ల బాలుడి కాళ్లు, చేతులు, తల భాగాన్ని నరికి వేరుచేసి ఆరా సమీపంలోని రైల్వే ట్రాక్పై పడేశారు. బాలుడి మృతదేహాన్ని పోలీసులు స్వాధీనం చేసుకున్నారు. మృతుడిని హరితోలా గ్రామానికి చెందిన అశోక్ యాదవ్ కుమారుడు దయా కుమార్(12)గా గుర్తించారు. బాధితుడు ఆరాలో ఐదో తరగతి చదువుతున్నాడు. నాలుగు రోజుల క్రితం దయా అదృశ్యమయ్యాడు. బాలుడి మృతి నేపథ్యంలో అతడి కుటుంబ సభ్యులు, గ్రామస్థులు వందలాది మంది ఆందోళన చేపట్టారు. తమ బిడ్డ మృతిపై పోలీసులు నిర్లక్ష్యం వహిస్తున్నారని ఆరోపించారు.
డ్రగ్స్కు బానిసై..
కేరళ కోజికోడ్లో దారుణం జరిగింది. తల్లిదండ్రులపై కత్తితో దాడికి పాల్పడ్డాడు ఓ కుమారుడు. ఆదివారం రాత్రి జరిగిందీ ఘటన. ఘటనాస్థలికి చేరుకున్న పోలీసులు నిందితుడిని అరెస్టు చేశారు. నిందితుడు డ్రగ్స్కు బానిసయ్యాడని పోలీసులు తెలిపారు. నిందితుడి తల్లిదండ్రులిద్దరినీ ఆస్పత్రికి తరలించారు పోలీసులు.
ఇవీ చదవండి: కశ్మీర్లో ఉగ్రదాడి.. ఇద్దరు యూపీ కూలీలు మృతి.. హైబ్రిడ్ ముష్కరుడు అరెస్ట్
'నా చాక్లెట్లు కొట్టేస్తోంది.. మా అమ్మను జైల్లో పెట్టండి'.. బుడ్డోడి ఫన్నీ ఫిర్యాదు
