Hight of Men In Bettiah District: బిహార్, బేతియా జిల్లాలోని మర్హియా గ్రామం.. దేశంలో ఓ ప్రత్యేకతను చాటుతోంది. అక్కడ వ్యక్తుల ఎత్తు ఇప్పుడు చర్చనీయాంశంగా మారింది. ఆ గ్రామంలో మగవారి ఎత్తు సాధారణంగా 6 అడుగుల కంటే ఎక్కువగా ఉంటుంది. ఆడవారి ఎత్తు 5 అడుగుల 10 అంగుళాల వరకు ఉంటుంది. ఆడవారికి వరుడు దొరకడం కష్టంగా మారింది.. కానీ మగవారికి మాత్రం వారి ఎత్తు వరంగా మారింది. గ్రామంలో యువకులంతా సైన్యంలో చేరి దేశానికి సేవ చేస్తున్నారు.
'గ్రామంలో 75 శాతం మంది ప్రజలు 6 అడుగుల ఎత్తు ఉంటారు. ప్రతి ఒక్కరు సైన్యంలో చేరాలని కోరుకుంటున్నారు. మా ఎత్తు అందుకు ఉపయోగపడుతోంది. గ్రామంలో మొత్తం 120 మంది యువకులు ఉన్నారు. అందరూ ప్రతి రోజు ఉదయం 4 గంటలకు లేచి సైన్యంలో చేరడానికి కావాల్సిన కసరత్తులు చేస్తుంటారు. గ్రామంలో మొత్తం 1400 మంది నివసిస్తున్నారు. ఇందులో రాజపుత్రులు కూడా ఉన్నారు.' అని సిద్దాంత్ కుమార్ సింగ్ తెలిపారు.
ఒకానొక సారి రహదారిలో ప్రయాణిస్తుండగా.. బేతియా మహారాజ హరేంద్ర కిషోర్ సింగ్పై ఓ ఏనుగు దాడి చేసింది. ఆ సమయంలో అక్కడే ఉన్న ధ్రువ్ నారాయణ్ సింగ్ రాజును కాపాడాడు. ఏనుగు తొండాన్ని కత్తితో నరికేశాడు. ఏనుగు మరణించింది. మహారాజు సురక్షితంగా బయటపడ్డాడు. నారాయణ్ సింగ్ ధైర్య సాహసానికి మెచ్చి అతనికి అక్కడే 100 బిగాల భూమిని దానంగా ఇచ్చాడు. అక్కడే స్థిరపడిన నారాయణ్ సింగ్ వంశం కొనసాగింది.
ఇదీ చదవండి: ఆంగ్లేయులను వణికించిన 'తుపాకుల దోపిడీ'
