Nupur Sharma Controversy: మహమ్మద్ ప్రవక్తపై వివాదాస్పద వ్యాఖ్యలతో అంతర్జాతీయ స్థాయిలో దుమారానికి కారణమైన భాజపా నేత నుపుర్ శర్మకు మహారాష్ట్ర పోలీసులు సమన్లు జారీ చేశారు. జూన్ 22న ఠాణేలోని ముంబ్రా పోలీస్ స్టేషన్లో విచారణ అధికారి ముందు హాజరై వాంగ్మూలం ఇవ్వాలని సూచించారు. వివాదాస్పద వ్యాఖ్యల నేపథ్యంలో నుపుర్పై నమోదైన కేసు ఆధారంగా ఈ సమన్లు జారీ చేసినట్లు ఓ అధికారి వెల్లడించారు. నుపుర్ శర్మపై నమోదైన ఎఫ్ఐఆర్ వివరాలను పేర్కొంటూ పోలీసులు.. ఈ-మెయిల్‌తో పాటు స్పీడ్ పోస్ట్ ద్వారా సమన్లు పంపినట్లు అధికారులు తెలిపారు.
మహమ్మద్ ప్రవక్తపై చేసిన వివాదాస్పద వ్యాఖ్యలను అనేక ఇస్లామిక్ దేశాలు ఖండించాయి. ఈ నేపథ్యంలో భాజపా.. నుపుర్ శర్మను ఆదివారం సస్పెండ్ చేసింది. టీవీ న్యూస్ డిబేట్లో మహమ్మద్ ప్రవక్తపై అభ్యంతరకర వ్యాఖ్యలు చేశారనే ఆరోపణలపై ముంబయి పోలీసులు మే 28న నుపుర్ శర్మపై పలు సెక్షన్ల కింద కేసు నమోదు చేశారు. ముంబయిలోని పిదోనీ పోలీసులు కూడా నుపుర్ శర్మపై ఎఫ్ఐఆర్ నమోదు చేశారు. మరోవైపు.. తనకు ప్రాణహాని ఉందని నుపుర్ శర్మ.. దిల్లీ పోలీసులకు ఫిర్యాదు చేశారు. ఈ నేపథ్యంలో దిల్లీ పోలీసులు నుపుర్ శర్మ, ఆమె కుటుంబ సభ్యులకు భద్రత కల్పించారు.
ఇవీ చదవండి: భాజపా నేతల వ్యాఖ్యలతో చిక్కులు.. భారత దౌత్య సమర్థతకు అగ్ని పరీక్ష
సిద్ధూ కుటుంబానికి రాహుల్ పరామర్శ.. పంజాబ్ లాయర్ల కీలక నిర్ణయం!
