'కొద్ది రోజుల్లోనే మీ డబ్బును రెట్టింపు చేస్తాం' అని చెప్పి స్కీమ్ పేరుతో భారీ స్కామ్కు పాల్పడ్డ ముఠాను బెంగళూరు సెంట్రల్ క్రైంబ్రాంచ్ పోలీసులు అరెస్టు చేశారు. వారి వద్ద నుంచి రూ.17కోట్ల నగదు, రూ.2 కోట్లు విలువ చేసే ఆభరణాలను స్వాధీనం చేసుకున్నారు. వీరంతా ప్రజలను రూ.40కోట్ల మేర మోసం చేసినట్లు పోలీసులు వెల్లడించారు. నిందితులను ఇమ్రాన్, శీతల్ బస్తవాడి, జబియుల్లా ఖాన్, రెహ్మాతుల్లా ఖాన్గా గుర్తించారు.
రూ.5000 పెట్టుబడి పెడితే రోజుకు రూ.49 వడ్డీ ఇస్తామని నిందితులు ప్రజలకు సందేశాలు పంపేవారు. వారిని నమ్మించడానికి గూగుల్ ప్లే స్టోర్ షేర్హ్యాష్ యాప్ను డౌన్లోడ్ చేసుకోవాలని చెప్పేవారు. ఎవరికీ అనుమానం రాకుండా కొద్ది రోజులు వడ్డీ జమ చేశారు. ఈ స్కీమ్ కోసం ఏకంగా 900 వాట్సాప్ గ్రూప్లు క్రియేట్ చేశారు. ఒక్కో గ్రూప్లో 256 మంది సభ్యులున్నారంటే వీరి డిమాండ్ అర్థం చేసుకోవచ్చు. కరోనా లాక్డౌన్ సమయం నుంచి నిందితులు ఈ దందా నడుపుతున్నారు. ఇన్వెస్టర్లు భారీగా పెరిగిన తర్వాత ఆ డబ్బునంతా కాట్యాట్ టెక్నాలజీ కంపెనీ, సిరోలిన్ టెక్ సొల్యూషన్స్, నైలిన్ ఇన్ఫోటెక్, మాల్ట్రెస్ ఎగ్జిమ్, క్రాపింగ్టన్ అనే సంస్థలకు బదిలీ చేశారు.
తీరా 2022 జనవరిలో షేర్హ్యాష్ యాప్ సాంకేతిక కారణాల వల్ల పనిచేయడం లేదని నిందితులు ఇన్వెస్టర్లకు చెప్పారు. త్వరలోనే అప్డేట్ చేసి కొత్త వెర్షన్ను అందుబాటులోకి తీసుకొస్తామన్నారు. కానీ నెలలు గడిచినా యాప్ రిలీజ్ కాలేదు. ఇన్వెస్టర్ల డబ్బు వాపస్ రాలేదు. దీంతో పోలీసులు రంగంలోకి దిగి విచారించగా.. అసలు స్కామ్ బయటపడింది. ఈ ముఠా నుంచి నగదు, బంగారంతో పాటు ల్యాప్టాప్లు, విలువైన వస్తువులను పోలీసులు స్వాధీనం చేసుకున్నారు.
ఎయిర్టెల్, ఐసీఐసీఐకి ఫైన్: మరోవైపు.. సైబర్ మోసానికి గురైన బాధితుడికి పరిహారం చెల్లించాలని ఎయిర్టెల్, ఐసీఐసీఐ బ్యాంక్కు ఆదేశాలు జారీ చేసింది వినియోగదారుల కమిషన్. తమిళనాడు చెన్నైలోని వెస్ట్ తంబరానికి చెందిన జే యేసుదయాన్ అనే వ్యక్తి 2012లో ఎయిర్టెల్ పోస్ట్పెయిడ్ నంబర్ను వినియోగించేవాడు. ఓ రోజు ఉన్నట్టుండి అతని నంబర్ పని చేయడం ఆగిపోయింది. తన అనుమతి లేకుండా నంబర్ రద్దు చేశారని ఎయిర్టెల్ను సంప్రదించినా స్పందన సరిగ్గాలేదు. వేరే నంబర్ తీసుకోవాలని అతనికి సూచించారు సిబ్బంది. అదే సమయంలో అతని ఐసీఐసీఐ బ్యాంకు ఖాతా నుంచి రూ.4.89 లక్షలు ట్రాన్స్ఫర్ అయ్యాయి. అతనికి తెలియని నాలుగు ఖాతాల్లోకి ఈ మొత్తం వెళ్లింది. దీంతో అతను జిల్లా వినియోగదారుల కమిషన్కు ఫిర్యాదు చేశాడు. సేవలు నిలిపివేసి వినియోగదారుడ్ని ఇబ్బంది పెట్టడమేగాక, మానసిక ఒత్తిడికి కారణమయ్యారని కమిషన్ ఎయిర్టెల్, ఐసీఐసీఐ బ్యాంకుకు ఫైన్ వేసింది. అతనికి రూ.4.89లక్షల పరిహారంతో పాటు ఒత్తిడికి గురి చేసినందుకు మరో రూ.2లక్షలు చెల్లించాలని ఆదేశించింది. అతని ఫిర్యాదు ఖర్చులు రూ.10వేలు కూడా కలిపి నెల రోజుల్లో చెల్లించాలని చెప్పింది.
ఇదీ చదవండి: కళ్లల్లో కారం కొట్టి రూ.కోటి చోరీ.. పట్టపగలే నడిరోడ్డుపై..
