సృష్టిలో అమ్మను మించిన దైవం లేదు. అమ్మ ప్రేమలో స్వార్థం ఉండదు. తన బిడ్డకు చిన్న దెబ్బతగిలితే తానే ఎక్కువగా తల్లడిల్లిపోతుంది. దేశవ్యాప్తంగా లాక్డౌన్ కట్టుదిట్టంగా అమలు జరగుతున్న తరుణంలో.. అనారోగ్యానికి గురైన కొడుకును చూసేందుకు సాహసమే చేసింది కేరళలోని తిరువనంతపురానికి చెందిన ఓ మాతృమూర్తి. ఏకంగా 6 రాష్ట్రాలు దాటి 2,700 కిలో మీటర్లు ప్రయాణించింది.
కేరళలోని తిరువనంతపురానికి చెందిన షీలమ్మ (50) అనే మహిళ కొడుకు బీఎస్ఎఫ్ జవాను. రాజస్థాన్ జోధ్పుర్లో విధులు నిర్వర్తిస్తున్నాడు. అతనికి భార్య, ఏడాది వయసున్న కుమారుడు ఉన్నారు. అయితే.. అతడు మైయోసిటిస్తో బాధపడుతున్నాడు. లాక్డౌన్ కొనసాగుతున్న నేపథ్యంలో కొడుకును కలుసుకునే వీలులేకుండా పోయింది. ఈ నేపథ్యంలో ఎలాగైనా తన బిడ్డను చూడాలని నిర్ణయించుకుంది. తన అల్లుడు, ఇంకో బంధువుతో కారులో మూడు రోజుల పాటు 6 రాష్ట్రాల మీదుగా 2,700 కిలోమీటర్లు ప్రయాణించి జోధ్పుర్కు చేరుకుంది.
" నా కొడుకు అనారోగ్యంతో బాధపడుతున్నాడు. తనని చూసేందుకు వెళ్లాలని నిశ్చయించుకున్నా. ఇందుకు కొట్టాయం నుంచి జోధ్పుర్ ప్రయాణించాం. దేవుని దయవల్ల మేము ఎక్కడా ఎటువంటి సమస్యలు లేకుండా ఇక్కడ వరకు చేరుకున్నాం. మాకు ఎంతో సహకరించిన కేంద్రమంత్రి వి.మురళీధరన్, ముఖ్యమంత్రికి నా ధన్యవాదాలు. "
- షీలమ్మ, తల్లి
అధికారుల సాయంతో..
కొడుకు దగ్గరకు వెళ్లాలనుకున్న షీలమ్మ కేరళ నుంచి తమిళనాడు, కర్ణాటక, మహారాష్ట్ర, గుజరాత్ మీదుగా రాజస్థాన్ చేరుకున్నారు. ఇందుకు వారి కుటుంబం దేశవ్యాప్తంగా ప్రయాణానికి అవసరమైన పాస్లను పొందారు. అంతేకాకుండా వీహెచ్పీ సంస్థ ఏర్పాటు చేసిన హిందూ హెల్ప్లైన్ వలంటీర్లు ఓ క్యాబ్ ఏర్పాటు చేశారు. అంతేకాకుండా ఇద్దరు టాక్సీడైవర్లనూ జోధ్పుర్ వరకు పంపించారు. కొట్టాయం జిల్లా కలెక్టర్ పీకే.సుధీర్ బాబు ప్రయాణానికి అవసరమైన పాస్లను అందించారు. షీలమ్మ, అల్లుడు పార్వత్యం, మరో వ్యక్తితో కలిసి ఈనెల 11న బయలుదేరి 14న జోధ్పుర్ చేరుకున్నారు.
ఇదీ చదవండి: మాస్కుల వాడకంపై మరింత స్పష్టత ఇచ్చిన కేంద్రం
