కరోనా టెస్టుల్లో ప్రధాన పరీక్షగా భావించే 'ఆర్టీ-పీసీఆర్'లోనూ కచ్చితత్వం లేదని తెలుస్తోంది. ఈ పరీక్షల ద్వారా ఇద్దరు వ్యక్తులను పరీక్షించగా భిన్న ఫలితాలు వచ్చాయి. ఇందులో భాగంగా వారి నమూనాలను టెస్టు చేయగా రెండుసార్లు నెగెటివ్గానూ.. ఓ సారి పాజిటివ్గానూ నిర్ధరణ అయింది. అలా నాలుగైదు రోజుల వ్యవధిలోనే వారివురికీ భిన్న ఫలితాలొచ్చాయి. అయితే.. ప్రస్తుతం ఆ ఇద్దరూ పూర్తి ఆరోగ్యంగా ఉన్నట్టు తెలుస్తోంది.
గుజరాత్లోని అహ్మదాబాద్కు చెందిన పీయూష్భాయ్ వాఘేలా.. ఈ నెల 5న ఆర్టీ-పీసీఆర్ ద్వారా కరోనా టెస్ట్ చేయించుకోగా వైరస్ లేనట్టు నిర్ధరణ అయింది. అనంతరం అతడు వేరే జబ్బుతో ఆసుపత్రికి వెళ్లగా.. ప్రోటోకాల్ ప్రకారం మళ్లీ కొవిడ్ టెస్ట్లు నిర్వహించారు. ఆ ఫలితాల్లో పాజిటివ్గా తేలింది. దీంతో అనుమానం వచ్చి వేరొక ప్రైవేట్ ల్యాబ్లో టెస్ట్ చేయించుకోగా.. అక్కడ కరోనా నెగెటివ్ వచ్చింది. ఇలా 5 రోజులుగా కొవిడ్ పరీక్షల్లో భిన్న ఫలితాలను ఎదుర్కొన్నాడు పీయూష్.
పీయూష్భాయ్ పరీక్షా విధానం- ఫలితాలు
- సెప్టెంబర్ 5: ఆర్టీ-పీసీఆర్ టెస్ట్ - నెగెటివ్
- సెప్టెంబర్ 8: ఆర్టీ-పీసీఆర్ టెస్ట్ - పాజిటివ్
- సెప్టెంబర్ 9: ఆర్టీ-పీసీఆర్ టెస్ట్ - నెగెటివ్
అచ్చం పీయూష్ తరహా ఘటనే.. అహ్మదాబాద్లోనే కృనాల్ పంచాల్కు ఎదురైంది. ఈ నెల 10న కృనాల్కు యాంటిజెన్ పరీక్షలు నిర్వహించింది అహ్మదాబాద్ మున్సిపల్ కార్పొరేషన్. ఫలితాల్లో కరోనా సోకలేదని తేలింది. అనంతరం కిడ్నీ సంబంధిత చికిత్స కోసం మరుసటి రోజు ఆస్పత్రికి వెళ్లాడు కృనాల్. అక్కడ ఆర్టీ-పీసీఆర్ టెస్ట్లు చేయగా.. కొవిడ్ పాజిటివ్గా నిర్ధరణ అయింది. అనుమానంతో సెప్టెంబర్ 14న ఓ ప్రైవేట్ ప్రయోగశాలను ఆశ్రయించాడు. ఇక్కడ నిర్వహించిన ఆర్టీ-పీసీఆర్ పరీక్షల్లో నెగెటివ్గా తేలింది. ఆ తర్వాత కిడ్నీ చికిత్స నిమిత్తం ఆస్పత్రిలో చేరిన కృనాల్.. ఇప్పుడు డిశ్చార్జి అయి, ఆరోగ్యంగా ఉన్నాడు.
కృనాల్ పంచాల్ కరోనా పరీక్షల నిర్వహణ తీరు- ఫలితాలు
- సెప్టెంబర్ 10: ర్యాపిడ్ యాంటిజెన్ టెస్ట్ - నెగెటివ్
- సెప్టెంబర్ 11: ఆర్టీ-పీసీఆర్ టెస్ట్ - పాజిటివ్
- సెప్టెంబర్ 12: ర్యాపిడ్ యాంటిజెన్ టెస్ట్ - నెగెటివ్
- సెప్టెంబర్ 14: ఆర్టీ-పీసీఆర్ టెస్ట్ - నెగెటివ్
ఫలితాలపై నిపుణుల అభిప్రాయం
భిన్న ఫలితాలపై 'ఈటీవీ భారత్'కు సమగ్ర వివరణ ఇచ్చారు అహ్మదాబాద్ మెడికల్ అసోసియేషన్ అధ్యక్షులు మోనా దేశాయ్. ర్యాపిడ్ యాంటిజెన్ పరీక్షల్లో 40 నుంచి 50శాతం మాత్రమే కచ్చితత్వం ఉంటుందని ఆమె తెలిపారు. అయితే.. ఆర్టీ-పీసీఆర్లో మాత్రం 60 నుంచి 70 శాతం వరకు కచ్చితమైన ఫలితాలొస్తాయన్నారు.
శరీరంలో వైరస్ ప్రభావం తక్కువగా ఉన్న సమయంలో నెగెటివ్ ఫలితాలు వచ్చినా.. జ్వరం వంటి లక్షణాలు అలాగే ఉంటాయని మోనా పేర్కొన్నారు. అలాంటప్పుడు 90శాతం కచ్చితమైన ఫలితాలనిచ్చే సీటీ-స్కాన్ పరీక్షలు చేయించుకోవాలని సూచించారు.
ఇదీ చదవండి: బీపీ పరీక్ష సమయంలో పొరపాట్లు చేయొద్దు
