బిహార్ అసెంబ్లీ ఎన్నికల్లో మూడు దశల్లో కీలక ఘట్టంగా చెప్పుకుంటోన్న రెండో దఫా పోలింగ్కు సర్వం సిద్ధమైంది. 94 స్థానాలకు మంగళవారం(నవంబర్ 3న) ఓటింగ్ జరగనుంది. ఇందుకోసం 17 జిల్లాల్లో మొత్తం 41,362 పోలింగ్ కేంద్రాలు ఏర్పాటు చేసినట్లు ఎన్నికల సంఘం వెల్లడించింది. కరోనా దృష్ట్యా తగిన జాగ్రత్తలు తీసుకున్నట్లు తెలిపింది.
రెండో దఫా పోలింగ్ విశేషాలు:
- 2.85 కోట్ల మంది ఓటర్లు.. 1,463 మంది అభ్యర్థుల భవితవ్యాన్ని తేల్చనున్నారు. బరిలో నిలిచిన మొత్తం అభ్యర్థుల్లో 10 శాతం (146) మంది మహిళలు ఉన్నారు. మహిళా ఓటర్ల సంఖ్య 1.35 కోట్లుగా ఉంది.
- మహారాజ్గంజ్ నియోజకవర్గంలో అత్యధికంగా 27 మంది అభ్యర్థులు బరిలో నిలవగా.. అత్యల్పంగా దరౌలిలో నలుగురు పోటీలో ఉన్నారు.
- ప్రధాన పార్టీల్లో ఆర్జేడీ 56 స్థానాలు, దాని భాగస్వామ్య పార్టీ కాంగ్రెస్ 24 స్థానాల్లో పోటీ చేస్తున్నాయి. ఇటీవలే మహాకూటమిలో చేరిన సీపీఐ, సీపీఎం నాలుగు సీట్లలో బరిలో నిలుస్తున్నాయి.
- ఎన్డీఏలో భాగమైన భాజపా 46 స్థానాల్లో పోటీ చేస్తుండగా.. జేడీయూ 43 స్థానాల్లో బరిలో నిలుస్తోంది. ముకేశ్ సాహ్నీకి చెందిన వీఐపీ.. మిగిలిన ఐదు స్థానాల్లో పోటీ చేస్తోంది.
- లోక్జన శక్తి పార్టీ 52 స్థానాల్లో పోటీ చేస్తోంది. ఈసారి ఓ ట్రాన్స్జెండర్ను బరిలో నిలిపింది.
మొత్తం అసెంబ్లీ స్థానాల్లో రెండో దశలోనే అత్యధిక స్థానాలకు ఓటింగ్ జరగటం సహా.. కీలకమైన అభ్యర్థులు బరిలో ఉండటం ఆసక్తి రేపుతోంది. ప్రతిపక్ష మహా కూటమి ముఖ్యమంత్రి అభ్యర్థి, ఆర్జేడీ నేత తేజస్వీ యాదవ్ సహా బడా రాజకీయ నేతలు, తలపండిన సీనియర్లు, ప్రస్తుత ప్రభుత్వంలోని పలువురు మంత్రులు బరిలో ఉన్నారు.
ఇవీ చూడండి: బిహార్ బరి: రెండోదఫాలో వీరి దశ తిరిగేనా?
బిహార్ బరి: సీమాంచల్లో ఆధిపత్యం ఎవరిది?
