దేశంలో విజృంభిస్తున్న కరోనాకు కళ్లెం వేసేందుకు ఉన్న ఏకైక మార్గం.. లాక్డౌన్. మరి ఆ లాక్డౌన్ సక్రమంగా అమలు చేసేందుకు ప్రాణాలను పణంగా పెట్టి రోడ్లపై గస్తీ కస్తున్నారు పోలీసులు. కానీ, వారి ప్రయత్నానికి అడుగడుగునా ఆటంకాలు కల్పిస్తూ.. అధికారాన్ని బలాన్ని చూపిస్తున్నారు కొందరు సీనియర్ అధికారులు. బిహార్ అరారీయాలో తన కర్తవ్యాన్ని నిర్వర్తించినందుకు ఓ పోలీసును 50 గుంజీలు తీయించారు జిల్లా వ్యవసాయాధికారి(డీఏఓ).
అనుమతి పత్రం చూపమన్నందుకు...
సూరజ్పుర్ వంతెన వద్ద, జోకీహాట్ పోలీసులతో కలిసి ఆ ప్రాంతంలో లాక్డౌన్ కఠినంగా అమలయ్యేలా చూస్తున్నాడు హోంగార్డు గణేశ్ లాల్ తాత్మా. అదే దారిలో డీఏఓ మనోజ్ కుమార్ వాహనం వచ్చింది. అన్ని వాహనాల్లాగే ఆ కారునూ ఆపి.. ఆరా తీశాడు లాల్. ఎక్కడికైనా వెళ్లాలంటే అధికారిక అనుమతి పత్రాన్ని చూపించమని కోరాడు.
అంతే, డీఏఓ కారునే ఆపుతావా.. అంటూ ఆగ్రహంతో ఊగిపోయాడు మనోజ్. 'ఉన్నతాధికారుల ముందు నువ్వు నన్ను అవమానించావు. నేను తలచుకుంటే నిన్ను జైల్కు పంపగలను.' అని సవాల్ చేశాడు. ఇష్టం వచ్చినట్టు తిడుతూ.. హోంగార్డునే గుంజీలు తీయించాడు.
ఈ విషయమై అరారీయా జిల్లా ఐజీ, ఎస్పీలతో మాట్లాడి.. నివేదిక కోరారు బిహార్ డీజీపీ గుప్తేశ్వర్ పాండే. పూర్తి వివరాలు తెలిశాక హోంగార్డుతో దురుసుగా ప్రవర్తించిన ఆ అధికారిపై చర్యలు తీసుకుంటామన్నారు.
ప్రతిపక్ష నేత స్పందన..
బిహార్ శాసనసభా ప్రతిపక్ష నేత తేజస్వీ యాదవ్ ఈ ఘటనపై ఆగ్రహం వ్యక్తం చేశారు.
"బిహార్లో అధికార యంత్రాంగానికి అడ్డుఅదుపూ లేకుండాపోయింది. ఓ జిల్లా వ్యవసాయ అధికారిని అధికారిక పాస్ చూపించమని అడిగినందుకు కాపాలాదారున్ని గుంజీలు తీయమంటారా?
-తేజస్వీ యాదవ్
కరోనా విజృంభిస్తున్న సమయంలో క్షేత్ర స్థాయిలో సేవలందిస్తున్న పోలీసులపైనే దాడికి దిగుతున్నారు కొందరు. బిహార్లోనే కాదు.. పంజాబ్ పటియాలాలోనూ కేవలం వాహనాన్ని ఆపి అనుమతి పత్రాన్ని కోరినందుకు కొద్దిరోజుల క్రితం ఓ పోలీసు అధికారి చెయ్యి నరికేశారు దుండగులు.
ఇదీ చదవండి:లాక్డౌన్ వేళ అంబులెన్స్లో 3,213 కి.మీల ప్రయాణం!
