బిహార్లో అసెంబ్లీ ఎన్నికల ఫలితాల్లో అధికార ఎన్డీఏ ముందంజలో ఉంది. జేడీయూతో పోలిస్తే.. భాజపా ఆధిక్యంలో ఉండటం వల్ల ప్రస్తుతం కూటమి నాయకత్వంపై చర్చ ప్రారంభమైంది. భాజపా ఎక్కువ స్థానాలు గెలిస్తే.. ముఖ్యమంత్రి పీఠంపై పీటముడి పడే అవకాశం ఉన్నట్లు కనిపిస్తోంది. ఈ క్రమంలో బిహార్లో ఎన్డీఏ తిరిగి అధికారంలోకి వస్తే కూటమికి నితీశ్ కుమారే నేతృత్వం వహిస్తారా? అని అడిగిన ప్రశ్నకు సమాధానమిచ్చారు ఆ రాష్ట్ర భాజపా అధ్యక్షుడు సంజయ్ జైశ్వాల్. బిహార్లో ఎన్డీఏ నాయకత్వంపై ఎలాంటి వివాదం లేదని స్పష్టం చేశారు.
" ఎన్నికలకు చాలా రోజుల ముందే ఈ అంశంపై ప్రధాని మోదీ, భాజపా జాతీయ అధ్యక్షుడు జేపీ నడ్డా స్పష్టతనిచ్చారు. బిహార్ ప్రజలు నిజం ఏది, అబద్ధమేది అనేది తేల్చుకోగల సమర్థులు. "
- సంజయ్ జైశ్వాల్, భాజపా రాష్ట్ర అధ్యక్షుడు.
లెక్కింపు ప్రక్రియ ప్రారంభం సమయంలోనే నితీశ్ కుమార్ నేతృత్వంలోనే ఎన్డీఏ తిరిగి ప్రభుత్వాన్ని ఏర్పాటు చేస్తుందని దీమా వ్యక్తం చేసింది జేడీయూ. ఓటర్లను మభ్యపెట్టి ఓట్లు సాధించేందుకు విపక్షాలు తప్పుడు ప్రచారాలు చేశాయని ఆరోపించారు జేడీయూ అధినేత వశిష్ట నారాయణ్ సింగ్. ప్రభుత్వానికి భాజపా లేదా జేడీయూలో ఎవరు నాయకత్వం వహిస్తారని అడిగిన ప్రశ్నకు.. ప్రధాని మోదీ, కేంద్ర హోంమంత్రి అమిత్ షా, జేపీ నడ్డాలు పలు సందర్భాల్లో.. స్పష్టంగా వెల్లడించారని తెలిపారు సింగ్.
ఇదీ చూడండి: బిహార్లో 'భాజపా' జోరు- ఎన్డీఏ రయ్ రయ్!
