మార్కెట్లో కొనే అవసరం లేకుండా - ఇంట్లోనే "పావ్ భాజీ మసాలా" - ఇలా ప్రిపేర్​ చేసుకోండి!

మీకు పావ్ భాజీ అంటే ఇష్టమా? - ఈ పొడి గనుక ఉంటే క్షణాల్లో ప్రిపేర్ చేసుకోవచ్చు!

Pav Bhaji Masala Recipe in Telugu : నోరూరించే స్ట్రీట్ ఫుడ్​లో పావ్ ​భాజీ ఒకటి . పావ్ అంటే బన్ను, భాజీ అంటే కూరగాయలు. వీటితో తయారయ్యే పావ్​ భాజీని పిల్లల నుంచి పెద్దల వరకు అందరూ ఎంతో ఇష్టంగా తింటారు. వాతావరణం చల్లగా ఉన్నప్పుడు వేడి వేడిగా ఈ రెసిపీని ప్రిపేర్ చేసుకుని తింటుంటే ఆహా ఎంత బాగుంటుందో కదూ! అయితే, పావ్​ భాజీ ప్రిపేర్ చేసుకోవడానికి అన్నింటికంటే ముఖ్యంగా మసాలా పొడి చాలా అవసరం. అది గనుక సిద్ధంగా ఉంటే ఎప్పుడంటే అప్పుడు సింపుల్​గా పావ్ ​భాజీని తయారు చేసుకొని వేడివేడిగా తిని ఆనందించవచ్చు. మరి, ఆ పావ్​ భాజీ మసాలా పొడి కోసం ఎక్కడికో వెళ్లాల్సిన పని లేదు. మీరే చాలా సింపుల్​గా ఇంట్లోనే ప్రిపేర్ చేసుకోవచ్చు. ఇంతకీ, అందుకు కావాల్సిన పదార్థాలేంటి? ఎలా ప్రిపేర్ చేసుకోవాలో ఇప్పుడు చూద్దాం.

కావాల్సిన పదార్థాలు :

• ధనియాలు - 3 టేబుల్​స్పూన్లు
• జీలకర్ర - రెండున్నర టేబుల్​స్పూన్లు
• మిరియాలు - 2 చెంచాలు
• ఆమ్​చూర్ పౌడర్ - 1 టేబుల్​స్పూన్
• సోంపు - 1 టేబుల్​స్పూన్
• ఎండుమిర్చి - 12
• లవంగాలు - 10
• యాలకులు - 4
• దాల్చినచెక్క - 3 అంగుళాల ముక్క
• నల్ల యాలకులు - 2
• బిర్యానీ ఆకులు - 2
• స్టార్ మొగ్గ - 1
• డ్రై జింజర్ పౌడర్ - అర చెంచా

తయారీ విధానం :

• ఇందుకోసం ముందుగా స్టౌపై కడాయి పెట్టుకొని దాల్చినచెక్క, స్టార్ మొగ్గ, ధనియాలు, నల్ల యాలకులు, ఎండుమిర్చి, బిర్యానీ ఆకులు ఒకదాని తర్వాత ఒకటి వేసుకొని చక్కగా వేయించుకోవాలి. ఆపై వాటిని ఒక ప్లేట్​లోకి తీసుకొని పక్కనుంచాలి.
• ఆ తర్వాత అదే కడాయిలో లవంగాలు, మిరియాలు, జీలకర్ర, సోంపు, యాలకులను వేసి మంచి వాసన వచ్చే వరకూ వేయించుకొని పక్కకు తీసుకోవాలి.
• ఆపై ఆమ్​చూర్ పౌడర్, డ్రై జింజర్​ పౌడర్​లను కూడా కొన్ని క్షణాల పాటు వేయించి స్టౌ ఆఫ్ చేసి దింపేసుకోవాలి.
• ఇప్పుడు మిక్సీ జార్ తీసుకొని అందులో వేయించుకుని చల్లార్చుకున్న ఇంగ్రీడియంట్స్ అన్నీ వేసుకొని మెత్తగా గ్రైండ్ చేసుకోవాలి.
• అనంతరం ఈ పొడిని తడి లేని, గాలి చొరబడని సీసాలో స్టోర్ చేసుకుంటే చాలు. పావ్ ​భాజీ మసాలా రెడీ! మరి, ఇంకెందుకు ఆలస్యం మీరు పావ్ ​భాజీ ప్రియులైతే ఈజీగా ఇలా అందులోకి కావాల్సిన మసాలా పొడిని సిద్ధం చేసుకోండి.
• ఇక మీకు​ తినాలనిపించినప్పుడు ఉల్లి, టమాటా, క్యాప్సికం, బంగాళదుంప, బఠాణీలతో చేసే భాజీలో ఈ మసాలాను యాడ్ చేసుకుంటే చాలు. ఆపై పావ్​లను వెన్నతో వేయించి భాజీతో తింటుంటే కలిగే ఆ ఫీలింగ్ సూపర్​గా ఉంటుంది!

ఇవీ చదవండి :