ఐదేళ్లలోపు పిల్లలున్న తల్లిదండ్రుల్లో 50శాతం మంది టీకా సేవలను పొందలేకపోతున్నారని చిన్నారుల హక్కుల స్వచ్ఛంద సంస్థ చైల్డ్ రైట్స్ ఫర్ యూ(సీఆర్వై) తెలిపింది. దేశవ్యాప్తంగా 22రాష్ట్రాలు, కేంద్రపాలిత ప్రాంతాల్లో సర్వే నిర్వహించి ఈ విషయాన్ని వెల్లడించింది.
కరోనా వ్యాప్తి కట్టడికి విధించిన దేశవ్యాప్త లాక్డౌన్ కారణంగా పిల్లలకు రోగనిరోధకాలు(టీకాలు) అందించేందుకు తల్లిదండ్రులు తీవ్ర ఇబ్బందులు ఎదుర్కొంటున్నట్లు క్రై పేర్కొంది. ఫలితంగా చిన్నారులపై తీవ్ర ప్రభావం పడుతున్నట్లు వివరించింది.
తొలి రెండు సార్లు విధించిన లాక్డౌన్ సమయంలో మొత్తం 1100 మంది తల్లిదండ్రులు, చిన్నారుల సంరక్షుల నుంచి వివరాలు సేకరించింది క్రై.
క్రై సర్వే వివరాలు..
- ఐదేళ్ల లోపు చిన్నారులు గల తల్లిదండ్రులలో కేవలం 50 శాతం మందికే రోగనిరోధకాల సేవలు అందుబాటులో ఉన్నాయి.
- లాక్డౌన్ సమయంలో నాలుగింట ఒకవంతు వారికి మాత్రమే చిన్నారుల సాధారణ ఆరోగ్య సేవలు అందుబాటులో ఉన్నాయి.
- కరోనా వైరస్ ప్రభావం చిన్నారులపై లేనప్పటికీ.. రోగనిరోధకాలు అందకపోతే భవిష్యత్తులో వారే అధిక సంఖ్యలో బాధితులవుతారు.
- లాక్డౌన్ కారణంగా పిల్లల విద్యాభ్యాసాలపై తీవ్ర ప్రభావం పడినట్లు సర్వేలో పాల్గొన్న 77శాతం మంది తెలిపారు. ఈశాన్య రాష్ట్రాలో 87శాతం మంది, పశ్చిమ ప్రాంతాల్లో 56శాతం మంది ఆందోళన వ్యక్తం చేశారు.
- పిల్లల రోజువారీ కార్యక్రమాలు ప్రభావితమైనట్లు 60శాతం మంది చెప్పారు.
- లాక్డౌన్ సమయంలో పిల్లలు మానసిక ఉల్లాసాన్ని కోల్పోయారని 37 శాతం మంది అభిప్రాయపడ్డారు.
- ఆన్లైన్లో గడిపే సమాయాన్ని చిన్నారులు గణనీయంగా పెంచినట్లు 88 శాతం మంది తెలిపారు.
దేశ జనాభాలో 40శాతం మంది చిన్నారులే. కానీ వారికి బడ్జెట్లో కేటాయించే నిధులు కేవలం 3శాతమేనని క్రై సంస్థ సీఈఓ పూజా మర్వాహా వెల్లడించారు. కరోనా సంక్షోభం సమయంలోనూ చిన్నారుల అంశం అసలు చర్చకు రావడంలేదన్నారు. ఆన్లైన్లో నిర్వహించిన సర్వే ద్వారా లాక్డౌన్ సమయంలో .. చిన్నారుల శారీరక, మానసిక ఆరోగ్యం, పోషక పదార్ధాలు, విద్య, రక్షణపై ఏ విధంగా ప్రభావం పడుతుందో స్పష్టమవుతోందన్నారు.
