బంగాల్ ఉత్తర 24 పరగణాల జిల్లాలో స్థానికులు రాష్ట్ర సీఐడీ వాహనాలను పేల్చివేశారు. అక్రమంగా బాణసంచాను తయారు చేస్తుండగా దాడులు చేసి వాటిని స్వాధీనం చేసుకున్నారు సీఐడీ అధికారులు. ఈ చర్యను వ్యతిరేకిస్తూ అధికారులతో ఘర్షణకు దిగిన స్థానికులు, స్వాధీనం చేసుకున్న బాణసంచా ఉన్న వాహనాన్ని పేల్చేశారు. దీనితో పాటు పలు పోలీసు వాహనాలకు నిప్పంటించారు.
ఈ దాడి వల్ల హుగ్లీ జిల్లాలోని చిన్సురాలో పలు ఇళ్లలోని కిటికీలు, అలాగే నౌహతీ రామ్ఘాట్ ప్రాంతంలోని భవనాలు ధ్వంసమయ్యాయి. ఈ ఘటనలో ఇద్దరు పోలీసు సిబ్బంది గాయపడినట్లు అధికారులు తెలిపారు. పోలీసులు తమపై అక్రమంగా దాడి చేశారంటూ స్థానికులు రోడ్డుపై ఆందోళన చేశారు.
గత వారంలో అక్రమంగా బాణసంచాను తయారు చేస్తోన్న కర్మాగారంలో మంటలు చెలరేగి ఇద్దరు మహిళలతో సహా మొత్తం నలుగురు మృతి చెందారు. ఈ నేపథ్యంలో అధికారులు పలు ప్రాంతాల్లో సోదాలు నిర్వహిస్తున్నారు.
ఇదీ చూడండి:భారీ ఉగ్రకుట్ర భగ్నం.. ముగ్గురు ఐసిస్ ముష్కరుల అరెస్ట్
