ఆస్తి కోసమో లేక డబ్బు కోసమో హత్యలు చేశారన్న వార్తలు వింటుంటారు.. కానీ 'పాల' కోసం హత్య చేయడం ఎక్కడైనా విన్నారా? అవును మీరు విన్నది నిజమే. ఉత్తర్ప్రదేశ్ పురాన్పుర్లోని ఘుంగ్ఛాయ్లో ఈ విచిత్ర ఘటన చోటుచేసుకుంది. ఈ ఘర్షణలో 16 ఏళ్ల తన కొడుకును తుపాకితో కాల్చి తానూ ప్రాణాలొదిలాడు 55 ఏళ్ల గుర్ముఖ్ సింగ్ అనే వ్యక్తి.
గుర్ముఖ్ సింగ్ తన కోసం దాచుకున్న పాలను ఆయన పుత్రుడు జస్కరన్ తాగడం వల్లే ఈ విషాదం జరిగిందని స్థానికులు చెబుతున్నారు. ఇదే అంశంపై ఇద్దరి మధ్య గొడవ జరుగుతుండగా.. ఆపాలని చూసిన తన తమ్ముడినీ గుర్ముఖ్ గాయపరిచినట్లు పేర్కొన్నారు. అయితే అతను హుటాహుటిన ఆసుపత్రికి వెళ్లడం వల్ల ప్రాణాలు దక్కించుకున్నట్లు వివరించారు.
సోమవారం రాత్రి జరిగిన ఈ ఘటనపై కేసు నమోదు చేసిన పోలీసులు.. దర్యాప్తును ప్రారంభించారు.
