తక్కువ ఖర్చుతో కరోనా పరీక్ష చేసే కొత్త విధానాన్ని దిల్లీ ఐఐటీ విద్యార్థుల బృందం అభివృద్ధి చేసింది. 'కరోష్యూర్‌'గా పిలిచే ఈ కిట్ను కేంద్ర మానవ వనరుల అభివృద్ధి శాఖ మంత్రి రమేష్‌ పోఖ్రియాల్ నిశాంక్‌, మానవ వనరుల శాఖ సహాయ మంత్రి సంజయ్‌ ధోత్రేతో కలిసి బుధవారం విడుదల చేశారు.
ఈ కిట్ అందుబాటులోకి రావడాన్ని చారిత్రక సందర్భంగా అభివర్ణించారు మంత్రి. ప్రపంచంలోనే అతి తక్కువ ఖర్చుతో ఆర్‌టీ-పీసీఆర్ (రియల్‌టైమ్‌-పీసీఆర్) ఆధారిత కరోనా పరీక్షల కిట్ను రూపొందించిన తొలి విద్యాసంస్థగా ఐఐటీ దిల్లీ నిలిచిపోతుందని ప్రశంసించారు.
రూ.650కే
నాన్‌-ఎక్స్‌క్లూజివ్‌ ఓపెన్‌ లెసెన్స్ ద్వారా కరోష్యూర్‌ను మార్కెట్లోకి తీసుకొచ్చేందుకు కంపెనీలకు వాణిజ్య అనుమతులు మంజూరు చేసినట్లు ఐఐటీ దిల్లీ తెలిపింది. న్యూటెక్‌ మెడికల్ డివైజెస్ అనే సంస్థ ఈ కిట్ను రూ.650కి మార్కెట్లోకి అందుబాటులోకి తీసుకొస్తున్నట్లు ప్రకటించింది.
"ఈ కిట్ అందుబాటులోకి రావడం వల్ల దేశంలో కరోనా పరీక్షల్లో కీలక మార్పులు రానున్నాయి. భారతీయ వైద్య పరిశోధనా మండలి (ఐసీఎమ్‌ఆర్), డ్రగ్‌ కంట్రోల్‌ జనరల్ ఆఫ్ ఇండియా(డీసీజీఐ) ఈ కిట్‌తో పరీక్షలు నిర్వహించేందుకు అనుమతులు మంజూరు చేశాయి. న్యూటెక్‌ మెడికల్ డివైజెస్... ఐఐటీ దిల్లీ టెక్నాలజీతో అతి తక్కువ ఖర్చుతో నెలకు 20 లక్షల పరీక్షలు చేస్తుంది."
-వి.రాంగోపాల్ రావు, దిల్లీ ఐఐటీ డైరెక్టర్‌
ప్రస్తుతం మార్కెట్లో ప్రోబ్‌-బేస్డ్‌ పరీక్షా విధానం అందుబాటులో ఉందని, కానీ తాము రూపొందించిన కిట్‌తో ప్రోబ్‌-ఫ్రీ విధానం ద్వారా పరీక్షలు చేయవచ్చని, దీని వల్ల పరీక్షలు చేసేందుకు అయ్యే ఖర్చు తగ్గుతుందని, అలానే ఫలితాల్లో కచ్చితత్వంలో ఎలాంటి రాజీ ఉండదని ఐఐటీ దిల్లీ తెలిపింది.
