కరోనాను విస్మరించి మంత్రి పర్యటన.. నెటిజన్ల విమర్శలు
కర్ణాటకలో రోజురోజుకు కరోనా కేసులు పెరుగుతున్న తరుణంలో.. ఆ రాష్ట్ర ఆరోగ్య మంత్రి శ్రీరాములు నిర్వహించిన ఓ పర్యటనపై విమర్శలు వెల్లువెత్తుతున్నాయి. చిత్రదుర్గ జిల్లా చిల్లెకెరె తాలుకాలో ఇవాళ శ్రీరాములు పర్యటించారు. మంత్రికి స్వాగతం పలకడం కోసం ఆయన అనుచరులు వ్యక్తిగత దూరం మరిచి భారీ ఎత్తున గూమిగూడారు.
శ్రీరాములుపై పూలు జల్లుతూ భారీ పూలమాలతో స్వాగతం పలికారు. ఈ ఊరేగింపులో మంత్రి శ్రీరాములుతో సహా అనేక మంది మాస్కులు లేకుండా కనిపించారు. కరోనా సమయంలో నిర్లక్ష్యంగా వ్యవహరించడంపై సామాజిక మాధ్యమాల్లో విమర్శలు వెల్లువెత్తుతున్నాయి.
