ఆటోడ్రైవర్గా బతుకు బండిని నడిపిస్తున్న అతనికి విద్యుత్ సంస్థ షాక్ ఇచ్చింది. ఫిబ్రవరి నెల కరెంటు బిల్లు చూసి అతను నోరెళ్లబెట్టాడు. వెయ్యి, రెండు వేలు కాదు ఏకంగా 56వేల రూపాయలు చెల్లించమంటూ బిల్లులో ఉంది. ఈ ఘటన మహారాష్ట్రలోని లాతుర్ జిల్లా హేర్గావ్లో జరిగింది.
హేర్గావ్లో కుటుంబంతో నివసిస్తున్న దస్తగీర్ షేక్ ఆటోడ్రైవర్గా జీవనం సాగిస్తున్నాడు. అతని ఇంట్లో కేవలం ఒక ఫ్యాన్, టీవీ, రెండు ఆరు వాట్ల బల్బులు ఉన్నాయి. ప్రతినెల సగటున రూ.800 నుంచి రూ.1000 మధ్య బిల్లు వచ్చేది. కానీ గత నెల మాత్రం రూ.56వేలు వచ్చింది. అయితే దస్తగీర్కి విద్యుత్ సంస్థ ఇలా షాకివ్వడం తొలిసారి కాదు. గతేడాది నవంబరులోనూ ఇలాగే భారీగా బిల్లు వేశారు. 17వేల రూపాయలు చెల్లించాలని బిల్లులో పేర్కొన్నారు. దీనిపై దస్తగీర్ విద్యుత్ శాఖకు కూడా ఫిర్యాదు చేశాడు. అది పరిష్కారం అయ్యేలోపే మరోసారి ఇలా బిల్లు రావడం గమనార్హం.
ఈ ఘటనపై విద్యుత్ శాఖ స్పందించింది. మీటరులో సమస్యలు తలెత్తడం వల్ల ఈ తరహా ఘటనలు జరిగే అవకాశం ఉంటుందని వివరణ ఇచ్చింది.
ఇదీ చదవండి : మమత కోసం శివసేన కీలక నిర్ణయం
