Azharuddin Attends for ED Investigation : హెచ్సీఏ కేసులో తనపై వచ్చిన ఆరోపణలు నిజం కాదని హైదరాబాద్ క్రికెట్ అసోసియేషన్ (హెచ్సీఏ) మాజీ అధ్యక్షుడు, కాంగ్రెస్ నేత అజారుద్దీన్ పేర్కొన్నారు. ఇవాళ ఆయన ఈడీ ముందు విచారణకు హాజరయ్యారు. అనంతరం మాట్లాడిన అజారుద్దీన్, ఈడీ అధికారులకు తాను పూర్తిగా సహకరించినట్లు తెలిపారు. తనపై పెట్టిన కేసులన్నీ అక్రమమని, కుట్రపూరితంగా కావాలనే ఎఫ్ఐఆర్లు నమోదు చేశారని ఆయన అన్నారు.
గతంలో ఉప్పల్ పోలీస్ స్టేషన్లో నమోదైన ఎఫ్‌ఐఆర్ల ఆధారంగా ఈడీ కేసు నమోదు చేసిన విషయం తెలిసిందే. ఉప్పల్ స్టేడియంలో క్రికెట్ బాల్స్, జిమ్‌ పరికరాలు, ఫైర్ కిట్లు, ఇతర సామగ్రి కొనుగోలు లాంటి పలు చెల్లింపుల్లో అవకతవకలకు పాల్పడ్డారనే అరోపణలపై ఈడీ విచారణ జరిపింది. కాగా 2020-23 మధ్య హెచ్‌సీఏలో రూ.కోట్లలో అక్రమాలు జరిగినట్లు ఉప్పల్ పీఎస్‌లో పలు ఫిర్యాదులు వచ్చాయి.
