Nepal helicopter Crash : నేపాల్లో హెలికాప్టర్ కూలిన ఘటనలో ఐదుగురు మృతిచెందారు. కాఠ్‌మండూ వాయువ్యంగా సైట్ సూర్యచౌర్లోని పర్వతాలలో ఈ ప్రమాదం జరిగినట్లు అధికారులు వెల్లడించారు. మృతుల్లో ఓ మహిళతో పాటు నలుగురు పురుషులు ఉన్నట్లు తెలిపారు. సమాచారం అందుకున్న పోలీసులు, ఆర్మీ అధికారులు ఘటనాస్థలికి చేరుకుని సహాయక చర్యలు చేపట్టారు.
కాఠ్‌మండూ అంతర్జాతీయ విమానాశ్రయం నుంచి బుధవారం మధ్యాహ్నం 1:54 గంటలకు శ్యప్రుబేషికి వెళ్తుండగా ఈ ప్రమాదం జరిగింది. టేకాఫ్ అయిన మూడు నిమిషాలకే ఏటీసీతో సంబంధాలు కోల్పోయినట్లు అధికారులు తెలిపారు. ఈ ప్రమాదంలో నలుగురు చైనా పౌరులతో పాటు నేపాల్కు చెందిన పైలట్ మృతి చెందినట్లు అధికారులు పేర్కొన్నారు. అయితే, నేపాల్లో వరుస విమాన ప్రమాదాలు ఆందోళన కలిగిస్తున్నాయి. రెండు వారాల క్రితం జరిగిన విమాన ప్రమాదంలో 18మంది మృతి చెందారు.
