రామోజీరావు తెలుగు ప‌త్రికా రంగాన్ని మ‌లుపు తిప్పిన సంపాద‌కుడు : ఎంపీ కేశినేని చిన్ని - MP Chinni Tribute to Ramoji Rao

Vijayawada MP Keshineni Chinni Paid Tribute to Ramoji Rao: రామోజీ గ్రూపు సంస్థల ఛైర్మన్‌ రామోజీరావు తెలుగునాట ఈనాడు దినపత్రికను స్థాపించి తెలుగు ప‌త్రికా రంగాన్ని మ‌లుపు తిప్పిన సంపాద‌కుడు అని విజ‌య‌వాడ ఎంపీ కేశినేని చిన్ని అన్నారు. తెలుగు ప్రజల్లో దినపత్రికల పట్ల ఆసక్తిని, అభిరుచులను పెంపొందించడంలో రామోజీరావు విశేషమైన కృషి చేశారని ఆయన కొనియాడారు. ఫిల్మ్‌సిటీలోని రామోజీరావు నివాసానికి వెళ్లి ఆయన చిత్రప‌టం వ‌ద్ద చిన్ని నివాళులర్పించారు. ఈనాడు ఎండీ కిర‌ణ్​తోపాటు ఇత‌ర కుటుంబ స‌భ్యుల‌ను ఆయన పరామర్శించి ప్రగాఢ సానుభూతి తెలిపారు. 

రామోజీరావు  లేని లోటు పత్రికా రంగానికే కాదు, తెలుగు సాంస్కృతిక రంగానికి తీరని వెలితిగా భావిస్తునానన్నారు. రాష్ట్రానికే కాకుండా భారతావని మొత్తానికి చాలా తీరని లోటని చిన్ని పేర్కొన్నారు. రామోజీరావు పట్టుదల, కృషితో ఇంత పెద్ద సామ్రాజ్యాన్ని నిర్మించి మాలాంటి ఎంతో మందికి ఆదర్శంగా నిలిచారని కొనియాడారు. ఆయన చూపించిన మార్గంలోనే తామంతా నడుస్తున్నామన్నారు. ఎక్కడ ఉన్న ఆయన ఆత్మకు శాంతి చేకూరాలని చిన్ని స్మరించుకున్నారు.