ఎన్నికల వేళ వైఎస్సార్సీపీ ప్లాన్​- టీడీపీ శ్రేణులపై బైండోవర్‌ కేసులు

TDP MLC Bhumireddy Ram Gopal Reddy Comments on YSRCP Govt : ఎన్నికలు సమీపిస్తున్న వేళ జిల్లాలోని తెలుగుదేశం శ్రేణులపై ఉద్దేశపూర్వకంగా బైండోవర్‌ కేసులు పెడుతున్నారని ఆ పార్టీ ఎమ్మెల్సీ (MLC) భూమిరెడ్డి రాంగోపాల్‌ రెడ్డి ఆరోపించారు. ఈ మేరకు కలెక్టర్‌ విజయరామరాజును కలిసి ఫిర్యాదు చేశారు. అరాచకాలకు పాల్పడుతున్న వైఎస్సార్సీపీ శ్రేణులను వదిలేసి తెలుగుదేశం నేతల పైనే పోలీసులు కేసులు పెడుతున్నారని తెలిపారు.

ముఖ్యంగా పులివెందుల నియోజకవర్గంలో గ్రామాల్లోకి వెళ్లి టీడీపీ వారిని స్టేషన్​కు పిలిపించి బైండోవర్ కేసులు పెడుతున్నారన్నారు. అరాచకాలు, దందాలు, దౌర్జన్యాలు చేసిన వైఎస్సార్సీపీ వారిపై ఎలాంటి కేసులు పెట్టడం లేదన్నారు. జిల్లాలో వైఎస్సార్సీపీ నాయకులు, కార్పొరేటర్లకు ఇష్టారాజ్యంగా గన్ లైసెన్సులు మంజూరు చేశారని ఆయన ఫిర్యాదులో పేర్కొన్నారు. ఇదే అంశంపై 8 నెలల కిందట ఆర్టీఐ ద్వారా జిల్లాలో ఎంతమందికి గన్ లైసెన్సులు మంజూరు చేశారని కోరితే అధికారుల నుంచి ఇంతవరకు స్పందన లేదన్నారు. ఎన్నికల్లో అసాంఘిక శక్తులు తుపాకులు పట్టుకుని తిరిగితే ఎవరు బాధ్యత వహిస్తారని ఆయన ప్రశ్నించారు.