'ఉన్నది ఒకటే జిందగీ - నెలలో ఓ 2 పర్యాటక ప్రదేశాలకైనా వెళ్లిరండి' - Jupally Participates In Bike Rally

Minister Jupally Participates In Bike Rally in Hyderabad : ఒకే ఒక జీవితం. మరో జన్మ ఉంటుందో? లేదో. అందుకని ప్రతి వ్యక్తి కనీసం నెలకు రెండు రోజులైనా వివిధ పర్యటక ప్రాంతాలకు వెళ్లాలని ఆ శాఖ మంత్రి జూపల్లి అన్నారు. హైదరాబాద్​ నుంచి నాగార్జునసాగర్​ బుద్ధవనానికి బైక్​ ర్యాలీ తీశారు. బేగంపేట టూరిజం ప్లాజాలో తెలంగాణ పర్యాటక అభివృద్ధి సంస్థ, హైదరాబాద్​ బైక్​ రైడర్స్ సంయుక్తంగా నిర్వహించిన రైడ్​ టు ర్యాలీలో మంత్రి జూపల్లి ముఖ్య అతిథిగా పాల్గొన్నారు. జెండా ఊపి ర్యాలీని ప్రారంభించారు. ర్యాలీలో సుమారు 330 ద్విచక్ర వాహనాలతో మహిళలు, పురుషులు పాల్గొన్నారు.

ఈ నెల 27న అంతర్జాతీయ పర్యాటక దినోత్సవాన్ని పురస్కరించుకొని ఈ ర్యాలీ నిర్వహించారు. ఈ సందర్భంగా మాట్లాడిన ఆయన, మనకున్న జీవితం ఒక్కటేనని, ఇందులో కనీసం నెలకు రెండు రోజులైనా వివిధ ప్రాంతాలకు వెళ్లాలన్నారు. అలా వెళ్లడం వల్ల మనసుకు ఆహ్లాదం, ఆనందం కలుగుతుందని,  జీవితంలోని సగం సమస్యలకు పరిష్కారం దొరుకుతుందని తెలిపారు.