జలమయమైన హైదరాబాద్ - వరదలో కొట్టుకుపోయిన బైకర్ - కాపాడిన లోకల్స్ - BIKER WASHED AWAY IN HYDERABAD

Man Washed Away In Hyderabad Rain Floods : కుండపోత వర్షంతో హైదరాబాద్‌ నగరం ఉక్కిరిబిక్కిరి అవుతోంది. ప్రధాన రహదారులపై మోకాళ్లలోతు నీరు చేరడంతో వాహనదారులు తీవ్ర ఇబ్బందులు పడుతున్నారు. ఇందిరానగర్‌లోని రోడ్డులో గ్రీన్ బావర్చి హోటల్ సమీపంలో ద్విచక్రవాహనం అదుపుతప్పడంతో ఓ వ్యక్తి వరదలో కొట్టుకుపోయాడు. స్థానికులు గమనించి కాపాడారు. 

మరోవైపు భారీ వర్షంతో నగర వ్యాప్తంగా కాలనీలన్నీ జలమయమయ్యాయి. పలు లోతట్టు ప్రాంతాల్లోకి వరదనీరు చేరింది. జీహెచ్‌ఎంసీ పరిధిలోని విద్యాసంస్థలకు నేడు రాష్ట్ర ప్రభుత్వం సెలవు ప్రకటించింది. మలక్‌పేట ప్రధాన రహదారి రైల్వే బ్రిడ్జి కింద భారీగా వరద నీరు చేరడంతో వాహనాల రాకపోకలకు అంతరాయం ఏర్పడింది. వెంకటేశ్వర నగర్, ఇందర్‌సింగ్ నగర్, వాణీనగర్‌లలో ఇళ్లలోకి వరద చేరి స్థానికులు ఇబ్బంది పడ్డారు. ప్రశాంతి నగర్‌ వద్ద నాలా పొంగి రహదారుల్లోకి వరద నీరు ప్రవహిస్తోంది. న్యూబోయిన్‌పల్లి హర్షవర్ధన్ కాలనీలో వరద ఉద్ధృతి సృష్టించింది. భారీ వర్షానికి సనత్‌నగర్ నుంచి వ్యక్తి మృతదేహం కొట్టుకొచ్చింది.