నేను మాట్లాడితే దేవుళ్ల పేరిట రాజకీయం - మరి మీరు వేసే ప్రమాణాల సంగతేంటి? : బండి సంజయ్ - Bandi Sanjay Fires on Revanth Reddy

Bandi Sanjay Fires on Congress : తాను మాట్లాడితే దేవుళ్ల పేరిట రాజకీయం అంటున్న కాంగ్రెస్ నాయకులు, ఎన్నికల హామీల అమలుకు ఒట్టు పెట్టుకుంటున్నారని బీజేపీ జాతీయ ప్రధాన కార్యదర్శి, కరీంనగర్​ ఎంపీ అభ్యర్థి బండి సంజయ్ కుమార్ విమర్శించారు. కరీంనగర్ జిల్లా చొప్పదండిలో ఆయన సమక్షంలో బీఆర్ఎస్, కాంగ్రెస్ నాయకులు పార్టీలో చేరగా, వారికి కండువా కప్పి పార్టీలోకి ఆహ్వానించారు. ఈ సందర్భంగా మాట్లాడిన ఆయన వరి ధాన్యానికి క్వింటాల్​కు రూ.500 బోనస్​ చెల్లిస్తామన్న కాంగ్రెస్​ నేతలు, ధాన్యం కొనుగోళ్ల సమయంలో తరుగు పేరిట కోత విధిస్తున్నారని ధ్వజమెత్తారు.

ఈ క్రమంలోనే ధాన్యం కొనుగోళ్లు సక్రమంగా నిర్వహించలేని ప్రభుత్వం, పంద్రాగస్టులోపు రూ.2 లక్షల రుణమాఫీ చేస్తామంటోందని ఎద్దేవా చేశారు. ఎన్నికల సమయంలో ఇచ్చిన హామీలను ఇప్పటికీ అమలు చేయని కాంగ్రెస్​ నేతలు చెప్పే మాటలను ప్రజలెవరూ నమ్మే పరిస్థితిలో లేరన్నారు. మరోవైపు బీఆర్​ఎస్​, కాంగ్రెస్​ పార్టీలు తనను కరీంనగర్​లో ఓడించాలని చూస్తున్నాయని ఆయన ఆరోపించారు. ఏదేమైనా ఈ ఎన్నికల్లో భారీ మెజార్టీతో తనను గెలిపించాలని కోరారు.