కంటోన్మెంట్​ ఎమ్మెల్యేగా శ్రీగణేశ్​ ప్రమాణ స్వీకారం - MLA Shri Ganesh Oath Ceremony

Cantonment MLA Shri Ganesh Oath Ceremony In Assembly : సికింద్రాబాద్‌ కంటోన్మెంట్‌ కాంగ్రెస్‌ ఎమ్మెల్యే శ్రీగణేశ్​ ఇవాళ ప్రమాణ స్వీకారం చేశారు. అసెంబ్లీలో స్పీకర్ గడ్డం ప్రసాద్ కుమార్ ఛాంబర్‌లో ఈయన ప్రమాణ స్వీకార కార్యక్రమం జరిగింది. స్పీకర్‌ గడ్డం ప్రసాద్‌ కుమార్‌ ఎమ్మెల్యేగా శ్రీగణేశ్​తో ప్రమాణం చేయించారు. శాసనసభ వ్యవహారాల మంత్రులు శ్రీధర్‌ బాబు, హైదరాబాద్‌ ఇంఛార్జీ మంత్రి పొన్నం ప్రభాకర్‌, ప్రభుత్వ విప్‌ అడ్లూరి లక్ష్మణ్‌ కుమార్‌, మహబూబ్​నగర్‌ ఎమ్మెల్యే యెన్నం శ్రీనివాస్‌ రెడ్డి తదితరులు పాల్గొన్నారు.

అనంతరం ఎమ్మెల్యేగా ప్రమాణ స్వీకారం చేసిన శ్రీగణేశ్​​కు స్పీకర్ గడ్డం ప్రసాద్ కుమార్, మంత్రులు, ఖైరతాబాద్‌ డీసీసీ అధ్యక్షుడు రోహిన్‌ రెడ్డి తదితరులు శుభాకాంక్షలు తెలిపారు. కాగా కంటోన్మెంట్​ బీఆర్ఎస్​ ఎమ్మెల్యే లాస్య నందిత మరణించిన తర్వాత ఆ స్థానంలో ఇటీవలే జరిగిన పార్లమెంట్​ ఎన్నికతో పాటు జరిగిన ఉపఎన్నికలో కాంగ్రెస్ అభ్యర్థి శ్రీగణేశ్​ విజయం సాధించిన విషయం తెలిసిందే.