బిజీ ట్రాఫిక్​లో భారీ వర్షంలో బైక్​పై స్టంట్స్ - జారిపడి యువకుడు మృతి - వీడియో వైరల్ - BIKE STUNT ENDS IN TRAGEDY IN HYD

Bike Stunts Ends In Tragedy In : సోషల్ మీడియాలో హైలైట్ అవ్వడానికి లైక్స్ కోసం రీల్స్ చేస్తూ యువకులు తమ ప్రాణాల మీదకు తెచ్చుకున్న ఘటన రంగారెడ్డి జిల్లాలో చోటు చేసుకుంది. శనివారం సాయంత్రం హయత్ నగర్ పోలీస్ స్టేషన్ పరిధిలోని పెద్దఅంబర్పేట్ సమీపంలో జాతీయ రహదారిపై వర్షంలో కేటీఎం బైక్ పై ఇద్దరు యువకులు స్టంట్స్ రీల్స్ చేసే ప్రయత్నం చేశారు. బైక్​తో స్టంట్స్ చేస్తుండగా అదుపుతప్పి బైక్ కిందపడిపోయింది. 

ఈ ఘటనలో శివ అనే యువకుడికి తీవ్ర గాయాలై మృతి చెందాడు. డ్రైవింగ్ చేస్తున్న మరో యువకుడికి తీవ్ర గాయాలయ్యాయి. క్షతగాత్రుడిని స్థానికంగా ఉన్న ఆసుపత్రికి తరలించి చికిత్స అందిస్తున్నారు. విజయవాడ జాతీయ రహదారి పనులు కొనసాగుతుండటంతో జాతీయ రహదారిపై ఒక లైన్ మరమ్మతుల కోసం రోడ్లు వేసి వదిలివేయగా, ఆ రోడ్లపై యువకులు బైక్ లతో ఓవర్ స్పీడ్​లో వెళ్తూ రీల్స్ కోసం స్టంట్​లు చేయడంతో ఇలాంటి ఘటన చోటుచేసుకుంటున్నాయి. ప్రమాదంపై కేసు నమోదు చేసుకున్న హయత్ నగర్ పోలీసులు దర్యాప్తు చేస్తున్నట్లు తెలిపారు. రోడ్లపై స్టంట్స్ చేసేవారిపై కఠిన చర్యలు తీసుకుంటామని హెచ్చరిస్తున్నారు.